Bishkekte JEO-daǵy apat kezinde dıversııa men lańkestik belgileri baıqalmady – Bas prokýratýra
ASTANA. KAZINFORM — Bishkektegi JEO-daǵy apat kezinde dıversııa men lańkestik belgileri baıqalmady. Bul týraly Qyrǵyz Respýblıkasynyń Bas prokýratýrasy málim etti.
Vedomstvonyń málimetinshe, 2024 jyldyń 2 aqpanynda saǵat 03.00 shamasynda laýazymdy tulǵalardyń qyzmettik mindetterin tıisinshe oryndamaýy jáne qaýipsizdik erejelerin saqtamaýy saldarynan Bishkek jylý elektr ortalyǵynda jarylys bolǵan. Oqıǵa saldarynan zardap shekken bes adam túrli dárejedegi kúıikpen aýrýhanaǵa jetkizildi. Osydan keıin qalada jylý berý toqtatylyp, memleketke asa iri kólemde shyǵyn keltirilgen.
«Bishkek qalalyq prokýratýrasy 245 «Kommertsııalyq nemese ózge de uıymdar qyzmetkerleriniń ókilettigin asyra paıdalanýy», 317 «Magıstraldyq qubyrlardy salý, paıdalaný nemese jóndeý kezinde qaýipsizdik erejelerin buzý», 337 «Qyzmet babyn asyra paıdalaný» baptarynda kózdelgen qylmys boıynsha qylmystyq is qozǵady. Іsti tergeý Qyrǵyz Respýblıkasynyń Ulttyq qaýipsizdik memlekettik komıtetine tapsyryldy», - delingen habarlamada.
Esterińizge sala keteıik, 2 aqpanǵa qaraǵan túni Bishkek JEO-da apat bolyp, qondyrǵylar isten shyqqan bolatyn. Qyrǵyzstannyń Tótenshe jaǵdaılar mınıstrligi tehnogendik sıpattaǵy nusqamen qatar yqtımal dıversııany joqqa shyǵarmady.
Qyrǵyzstan prezıdenti Sadyr Japarov elordadaǵy jylý elektr ortalyǵynda bolyp, qalpyna keltirý jumystarynyń barysymen tanysty. Olarǵa turǵyn úıler men áleýmettik nysandardy jylýmen qamtýdy qalpyna keltirý boıynsha shuǵyl sharalar qabyldaý, sondaı-aq jylý elektr ortalyǵynyń jumysy tolyq qalpyna keltirilgenge deıin jedel aqparat berý tapsyryldy. Sonymen qatar memleket basshysy tótenshe jaǵdaı joıylǵanǵa deıin arnaıy qyzmetterdiń jumysyn kúsheıtilgen rejımge kóshirýdi tapsyrdy. Sondaı-aq olarǵa Bishkektegi jylý-elektr ortalyǵyn tolyqtaı jańartý mindeti júktelgen. Qyrǵyz Respýblıkasy Prezıdentiniń aıtýynsha, apatqa joǵary sapaly kómir sebep bolýy múmkin.
Mınıstrler kabınetiniń tóraǵasy – Qyrǵyz Respýblıkasy Prezıdenti ákimshiliginiń basshysy Aqylbek Japarov Almatyǵa jumys saparyn úzip, Bishkekke oraldy. Onda jedel shtabtyń otyrysyn ótkizip, onyń qorytyndysy boıynsha tıisti organdarǵa birqatar tapsyrma berdi.
