Bishkekte VI Dúnıejúzilik kóshpendiler oıyndarynyń ashylý saltanaty bastaldy
ASTANA. KAZINFORM - Qyrǵyzstan astanasyndaǵy jańa «Bishkek Arena» stadıonynda VI Dúnıejúzilik kóshpendiler oıyndarynyń saltanatty ashylý rásimi ótip jatyr.
Oǵan Shanhaı yntymaqtastyq uıymynyń sammıtine qatysý úshin kelgen memleket basshylary men birqatar halyqaralyq uıymdardyń jetekshileri qatysýda. Bul týraly Kazinform agenttiginiń Bishkektegi tilshisi habarlaıdy.
Qyrǵyzstannyń Mádenıet, aqparat jáne jastar saıasaty mınıstri Mırbek Mambetalıevtiń aıtýynsha, VI Dúnıejúzilik kóshpendiler oıyndarynyń resmı ashylý rásimine 20-ǵa jýyq memlekettiń basshysy qatysyp jatyr.
Olardyń qatarynda Qazaqstan Prezıdenti Qasym-Jomart Toqaev ta bar.
Saltanatty sharaǵa Birikken Ulttar Uıymyn qosa alǵanda, halyqaralyq uıymdardyń basshylary da kelgen.
Іs-sharany 800 buqaralyq aqparat quralynyń ókili jarııalap jatyr.
Resmı ashylý rásimi aıasynda Qazaqstan quramasynyń sportshylary qatysýshy elderdiń sherýinde el namysyn qorǵady.
Astanadaǵy jańa stadıonǵa Oıyndardyń ashylý saltanatyn tamashalaý úshin 30 myńǵa jýyq kórermen jınaldy.
Ashylý rásimine deıin qonaqtarǵa ulttyq dástúrlerdi, mádenıet pen zamanaýı ónerdi toǵystyrǵan aýqymdy merekelik shoý usynyldy.
Kontserttik baǵdarlamaǵa jergilikti jáne sheteldik ónerpazdardy, sondaı-aq Qyrǵyzstan men basqa elderdiń bı ujymdaryn qosa alǵanda, 2 myńǵa jýyq adam qatysyp jatyr.
Aıta keteıik, osyǵan deıin Qasym-Jomart Toqaev Qyrǵyzstan Prezıdenti Sadyr Japarovtyń shaqyrýymen Shanhaı yntymaqtastyq uıymyna múshe memleketter basshylary keńesiniń 26-otyrysyna jáne «ShYU+» formatyndaǵy kezdesýge qatysý úshin Bishkek qalasyna jumys saparymen barǵan bolatyn.
Osyǵan deıin VI Dúnıejúzilik kóshpendiler oıyndaryna 3 myńǵa jýyq sportshy qatysatyny týraly jazdyq.
