Bishkekte vagonda turatyn adamdardyń ómiri týraly kórme ashylady
Búgin Bishkekte «Ýaqytsha aıaldama» fotokórmesi bastalady, ol kádimgi vagonda uıymdastyrylady. Kazinform bul týraly Kabar agenttigine silteme jasap habarlaıdy.
Vagon Abdylas Maldybaev atyndaǵy qyrǵyz ulttyq akademııalyq opera jáne balet teatrynyń aldyna ornalasqan. Joba avtory Anna Karamýrzınanyń ıdeıasyna sáıkes, kelýshiler mundaı úıde turatyn adamdar ómiriniń atmosferasyna enýi úshin onyń ishine turmystyq zattar, kitaptar jáne fotosýretter qoıylǵan.
Anna Qyrǵyzstannyń ártúrli aımaqtaryn aralap, vagonda turatyn qyrǵyzstandyqtardyń ómir saltyn zerttegen.
Sońǵy on jyl boıy osy zertteýmen aınalysqan ol vagondardaǵy qyrǵyzstandyqtardyń turmys-tirshiligin, túsirilgen fotosýretterin jurtshylyq nazaryna usynýdy armandady.
Vagondar barlyq jerde ýaqytsha turǵyn úı, qonaqúı, saıajaı, ashana, tehnıkalyq qyzmet kórsetý stantsııalary nemese kitaphana retinde paıdalanylady. Olardy eldiń ár túkpirinen, joldyń boıynan nemese kommýnıkatsııadan alshaq taýly aımaqtardan kezdestirýge bolady.
Sondaı-aq Anna Karamýrzına elektr jaryǵy joq shalǵaı aımaqtarda adamdar shamdardy nemese telefondy qýattaý úshin kún batareıalaryn paıdalanǵandy jón sanaıtynyn anyqtady.
«Japan daladaǵy vagondardy kórgende, onda turatyn adamdardyń bul jerge qalaı kelgenin bilý maǵan qyzyq. Men mundaı vagondardy 2013 jyldan beri sýretke túsirip kelemin. Ár túsirgen saıyn jańa oryndar, jańa peızaj, jańa ómir saltyn kezdestiremin. Óz jobamda keremet tabıǵat aıasynda, jazyq dalada jáne qoǵamnan alshaq tirshilik etip jatqan adamdardyń eleýsiz tirshiligine kópshiliktiń nazaryn aýdarǵym keledi», - dedi joba avtory.
