Bishkekte V Dúnıejúzilik kóshpendiler oıyndary qarsańynda Ortalyq Azııa elderiniń mádenı murasy talqylandy
ASTANA. KAZINFORM – Qyrǵyzstan astanasynda Astanada ótetin V Dúnıejúzilik kóshpendiler oıyndary qarsańynda «Mádenı mura jáne dástúrlerdi saqtaý: Dúnıejúzilik kóshpendiler oıyndary Ortalyq Azııa elderdiń mádenı murasyn nyǵaıtýǵa jáne tanymal etýge qalaı úles qosady?» taqyrybynda dóńgelek ústel ótti. Sharany Qazaqstan Respýblıkasynyń Qyrǵyz Respýblıkasyndaǵy Elshiligi uıymdastyrdy, dep habarlaıdy Kazinform agenttiginiń menshikti tilshisi.
Іs-sharaǵa qazaqstandyq dıplomattar, «Dúnıejúzilik kóshpendiler oıyndary» jobasy men Búkilálemdik etnıkalyq oıyndar konfederatsııasy jobalarynyń avtory jáne jetekshisi Ashat Ákibaev, Qyrǵyz Respýblıkasy Mádenıet, aqparat, sport mınıstrligi janyndaǵy Dene shynyqtyrý jáne sport departamenti dırektorynyń orynbasary Samat Toktonalıev, Qyrǵyz Respýblıkasy Alpınızm federatsııasynyń prezıdenti Edýard Kýbatov, qoǵam qaıratkerleri, qazaq dıasporasynyń músheleri, BAQ jáne týrızm ókilderi, blogerler qatysty.
Qazaqstan Respýblıkasynyń Qyrǵyzstandaǵy Elshiliginiń keńesshisi Gúlmıra Sultanáli kezdesýge qatysýshylarǵa V Dúnıejúzilik kóshpendiler oıyndaryn Astanada ótkizýdiń Qazaqstan úshin qandaı mańyzy bar ekenin aıtty.
«Qazaqstan astanasy V Dúnıejúzilik kóshpendiler oıyndaryn ótkizýge daıyn. Bul bizdiń halyqtarymyzdyń rýhanı jáne órkenıettik qundylyqtarynyń ózara qoldaýy men ortaqtyǵyn kórsetedi. Olar 8-13 qyrkúıek aralyǵynda Astanada «Uly dala dúbiri» uranymen ótedi. Jarysqa 2800-den astam sportshy, sondaı-aq 89 elden resmı delegatsııalar qatysady dep josparlanǵan. Ózderińiz biletindeı, DKO ıÝNESKO-nyń materıaldyq emes qundylyqtary tizimine engizilgen, oǵan kóshpeli halyqtardyń ǵana emes, sonymen qatar álemniń túkpir-túkpirinen sportshylar qatysady. Qazaqstanda bul sharalarǵa úlken mán beriledi. Óıtkeni Oıyndar adamzat órkenıetiniń murasy jáne kóshpeli halyqtardyń rýhanı murasy retinde etnosport pen etnomádenı qozǵalysty damytýǵa orasan zor úles qosady. Sonymen qatar, DKO tek bizdiń elderde ǵana emes, búkil Ortalyq Azııada týrızmdi damytýǵa úlken serpin beredi», - dep atap ótti dıplomat.
Onyń aıtýynsha, Oıyndar aıasynda buqaralyq mádenı sharalar uıymdastyrylady. Etnoaýyl aýmaǵynda kóshpeliler órkenıetiniń murajaıy, qolónershiler qalasy jáne músin kórmeleri ashylady. Ulttyq mýzeıde «Kóshpendiler: tarıh, bilim, taǵylym» atty halyqaralyq ǵylymı-tájirıbelik konferentsııa ótedi.
Atap óteıik, 8-13 qyrkúıekte Astana qalasynda 5-shi Dúnıejúzilik kóshpendiler oıyndary ótedi. Іs-sharaǵa 89 elden 2000-nan astam sportshy qatysady dep josparlanýda. 5-shi Dúnıejúzilik kóshpendiler oıyndarynyń Bas demeýshisi - ALAGEUM ELECTRIC, Oıyndardyń Bas seriktesi - Halyk Bank. Astanada ótetin Dúnıejúzilik kóshpendiler oıyndarynda barlyǵy 21 sport túrinen 97 medal jıyntyǵy sarapqa salynady.
