Bishkekte Túrki memleketteri uıymyna múshe elder dinı kóshbasshylarynyń kezdesýi ótti

BІShKEK. KAZINFORM — Qyrǵyzstan astanasyndaǵy «Ala-Archa» memlekettik rezıdentsııasynda Túrki memleketteri uıymyna múshe memleketterdiń musylmandar dinı basqarmalary basshylary keńesiniń VI otyrysy ótti, dep habarlaıdy Kazinform menshikti tilshisi. 

Sharaǵa Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly, Kavkaz musylmandary dinı basqarmasynyń tóraǵasy sheıhýlıslam Allahshýkıýr Pashazade, Túrkııa Din isteri jónindegi basqarma tóraǵasy Álı Erbash, Ózbekstan musylmandary dinı basqarmasynyń tóraǵasy sheıh Nýrıddın Holıknazar, Qyrǵyzstan musylmandary dinı basqarmasynyń tóraǵasy Abdýlazız Hadjı Zakırov, Túrki memleketteri uıymynyń bas hatshysy Kýbanychbek Omýralıev, sondaı-aq basqa da din qaıratkerleri qatysty.

Uıymǵa múshe memleketterdiń bas múftıleri dinı saladaǵy yntymaqtastyqty jandandyrý joldaryn talqylap, ózara tájirıbe almasyp, ózekti máselelerdi birlesip sheshý joldaryn qarastyrdy.

Otyrys qorytyndysy boıynsha TMU-ǵa múshe memleketterdiń dinı basqarma basshylarynyń 6-shy otyrysynyń «Islamdaǵy úmbet birligi» qaýlysy qabyldanyp, Pátýa keńesi qabyldaǵan birqatar pátýa resmı túrde bekitildi.

Sondaı-aq otyrys barysynda múftıler alqasy klımattyń ózgerýimen kúresý, qorshaǵan ortany qorǵaý jáne sýdy únemdeý máseleleri boıynsha úndeý jasady. Bul qadam ıslamdyq jaýapkershilik turǵysynan qorshaǵan ortany qorǵaý isine úles qosýǵa baǵyttalǵany atap ótildi. 

Aıta ketelik Qyrǵyzstan parlamenti dárigerge kúsh kórsetkender úshin jaýapkershilik engizýdi maquldady.