Bishkekte týdy ózgertýge qarsy narazylyq aktsııasy ótti

Qyrǵyz eliniń astanasynda M.Gorkıı atyndaǵy saıabaqta memlekettik týdy ózgertýge qarsy narazylyq aktsııasy ótti, dep habarlaıdy Kazinfom. 

Beıbit mıtıngige jınalǵan 50-den astam adam Jogorký Kenesh depýtattarynyń elimizdiń memlekettik rámizindegi kún sáýlesiniń beınesin ózgertý týraly sheshimimen kelispeıtinin bildirdi. Aktsııaǵa qatysýshylar týdy aýystyrmaýdy jáne 7 jeltoqsanda azamattyq belsendi, búgingi aktsııanyń bastamashysy Aftandil Jorobekovti bosatýdy talap etti. Quqyq qorǵaý organdary ony respýblıkadaǵy áleýmettik jaǵdaıdy turaqsyzdandyrýǵa jáne jappaı tártipsizdikke shaqyrǵany úshin eki aı merzimge qamaýǵa alǵan bolatyn. 

Esterińizge sala keteıik, qarasha aıynyń sońynda Jogorký Kenesh depýtattary memlekettik týdy ózgertý týraly zań jobasyn birinshi oqylymda maquldady. Qujattyń tujyrymdamasyna qatysqan 80 depýtattyń 66-sy qoldasa, 8 halyq qalaýlysy qarsy shyqty. Memlekettik rámizdegi kún sáýlesin ózgertý týraly bastamany Qyrǵyz Respýblıkasy Parlamentiniń tóraǵasy Nurlanbek Shákıev pen depýtat Ýlan Prımov kóterdi. 

Buǵan deıin Qyrǵyz Respýblıkasynyń prezıdenti Sadyr Japarovtyń bul bastamany qoldaǵany habarlanǵan bolatyn. Sondaı-aq memlekettik rámizdegi kún sáýlesin ózgertýdi jaqtaǵan Qyrǵyz Respýblıkasy Ulttyq qaýipsizdik memlekettik komıtetiniń basshysy Kamchybek Tashıev bul týraly óziniń Facebook-tegi paraqshasynda jazdy. 

Elimizdiń memlekettik týyndaǵy sáýlelerdiń keskinin aldaǵy ýaqytta ózgertý ıdeıasy qyrǵyz qoǵamynda qyzý talqylanyp jatyr. Keıbireýler ony quptaıdy, al basqalary, kerisinshe, ózgeristerge úzildi-kesildi qarsy.