Bishkekte TMU elderiniń densaýlyq saqtaý mınıstrleri bas qosty
ASTANA. KAZINFORM — Qyrǵyzstan astanasyndaǵy «Ala-Archa» memlekettik rezıdentsııasynda Túrki memleketteri uıymyna múshe elderdiń densaýlyq saqtaý mınıstrleriniń 6-shy otyrysy ótip jatyr, dep habarlaıdy Kazinform agenttiginiń Bishkektegi menshikti tilshisi.
Alqaly jıynǵa Qazaqstan Respýblıkasynyń Densaýlyq saqtaý mınıstri Aqmaral Álnazarova, Qyrǵyz Respýblıkasynyń Densaýlyq saqtaý mınıstri Damırbek Osmonov, Ázerbaıjan Respýblıkasynyń Densaýlyq saqtaý mınıstri Teımýr Mýsaev, Túrkııa Respýblıkasy Densaýlyq saqtaý mınıstriniń orynbasary Nýrýllah Okmýsh, Ózbekstan Respýblıkasy Densaýlyq saqtaý mınıstriniń birinshi orynbasary Otabek Imamov jáne Túrki memleketteri uıymynyń Bas hatshysy Kýbanychbek Omýralıev arnaıy shaqyrylǵan.
Jıynǵa qatysýshylar dári-dármektiń qoljetimdiligi men qaýipsizdigin qamtamasyz etý, medıtsına kadrlaryn daıarlaý, tsıfrlyq tehnologııalar men jasandy ıntellektini damytý máselelerine nazar aýdardy.
«SK-Farmatsııa» JShS basqarma tóraǵasy Nurlybek Asylbekov Qyrǵyzstanǵa jumys saparynyń mán-jaıyn túsindirdi.
– Biz Túrki memleketteri uıymy densaýlyq saqtaý mınıstrleriniń kezekti otyrysyna qatysyp jatyrmyz. Qazaqstan delegatsııasyn QR Densaýlyq saqtaý mınıstri Aqmaral Álnazarova bastap keldi. Sapardyń basty maqsaty – TMU elderiniń medıtsınalyq jáne dári-dármek qaýipsizdigin qamtamasyz etý salasyndaǵy yntymaqtastyǵyn nyǵaıtý.
Spıker dári-dármek qaýipsizdigine erekshe toqtaldy.
— Jıynda TMU-ǵa múshe memleketterdiń birlesip dári-dármek satyp alý máselesi talqylanady. Elder preparattardy satyp alý kólemin biriktirgen kezde, olardyń quny tómendep, satyp alý múmkindikteri artady, — dep túsindirdi ol.
Onyń aıtýynsha, búginde «SK-Farmatsııa» Qyrǵyzstannyń «Kyrgyzfarmatsııa» memlekettik kásipornymen tyǵyz yntymaqtastyq ornatqan.
– Bıyl jáne kelesi jyly satyp alýǵa bolatyn 60-qa jýyq dári-dármek anyqtaldy. Bul 600 myń dollardan astam qarajatty únemdeýge múmkindik beredi. Olardyń qatarynda otandyq taýar óndirýshilerdiń de, iri farmkompanııalardyń da ónimderi bar. Preparattardy satyp alýda Qazaqstan men Qyrǵyzstannyń áleýetin biriktirý eki eldiń de bıýdjetin edáýir únemdeýge septigin tıgizedi, — dep atap ótti ol.
QR Dárilik zattar men medıtsınalyq buıymdardy saraptaý ulttyq ortalyǵynyń bas dırektory Dáýren Dıhanbaev taraptardyń taǵy bir mańyzdy máseleni talqylaıtynyn aıtty. Onyń sózinshe, jıynda Qazaqstan tarapynyń dárilik zattardy tirkeýdi ózara taný týraly usynysy qaralady.
– Búgingi jıynda dári-dármekti, sonyń ishinde Qazaqstanda óndirilgen preparattardy birlesip satyp alý máselesi talqylanady. Bizdiń uıym bul dárilerdi tirkeýge, tirkeýden keıingi qaýipsizdik baqylaýy men sapasyn qadaǵalaýǵa jaýap beredi. Qazaqstan tarapy dárilik zattardy tirkeýdi ózara tanýdy usynbaq. Bul tártip DDSU baǵalaýy boıynsha dári-dármekti retteý júıesi 3-deńgeıge jetken elderge qatysty. Qazir mundaı deńgeıge Qazaqstan men Túrkııa ıe. Al ózge elderge osy deńgeıge kóterilý úshin tájirıbelik qoldaý kórsetý usynylady, – dedi ol.
Dáýren Dıhanbaevtyń aıtýynsha, Qazaqstan men Qyrǵyzstan dári-dármektiń qaýipsizdigi týraly aqparat almasý jáne aqparattyq júıelerdi biriktirý jóninde kelisimge kelgen.
– Eki apta buryn Cholpon-Atada eki el ózara yntymaqtastyq týraly memorandýmǵa qol qoıdy. Onda tájirıbe almasý jáne eki elde dári-dármekti tirkeýdi jedeldetý jónindegi kelisimder bekitilgen. Búgin osy kelisimderdi bekitip, yntymaqtastyqtyń negizgi baǵyttaryn aıqyndaý josparlanyp otyr, – dedi ol.
Buǵan deıin Túrki elderi jasandy ıntellekt pen tsıfrlyq qaýipsizdik máselelerin talqylaǵanyn jazǵan edik.
