Bishkekte TMD arnaýly qyzmetteri ókilderiniń otyrysy ótip jatyr

ASTANA. KAZINFORM – Bishkekte Táýelsiz memleketter dostastyǵyna qatysýshy memleketterdiń qaýipsizdik organdary men arnaýly qyzmetteri basshylary keńesiniń 54-otyrysy ótip jatyr.

Arnaýly qyzmetter dostastyq elderi qaýipsizdigine tónetin qaýip-qaterlerdi baǵalaýdyń biryńǵaı ádisin engizý jáne olardy joıý úshin arnaýly qyzmetterdiń ózara is-qımyl tıimdiligin arttyrý máselelerin talqylaıdy.

Kezdesý barysynda arnaýly qyzmetter TMD-ǵa qatysýshy memleketterdegi ahýaldy turaqsyzdandyrý jáne konstıtýtsııalyq qurylymyn kúshpen ózgertý maqsatynda shetelden jaýyngerlik daıyndyqtan ótken tulǵalardy anyqtaý jáne olardyń áreketiniń jolyn kesý boıynsha birlesken is-sharalardy aıqyndaıdy.

Sonymen qatar is-shara qatysýshylary lańkestikpen jáne dinı ekstremızmmen kúres salasynda, onyń ishinde Ulttyq lańkestikke qarsy komıtet bazasynda jumys isteıtin Lańkestikke qarsy is-qımyl jónindegi halyqaralyq derekter banki aıasynda aqparat almasýdy jetildirý joldaryn qarastyrady.

Dostastyqtyń lańkestikke qarsy ortalyǵy keńes músheleriniń qaraýyna TMD-ǵa qatysýshy memleketterdiń 2023-2025 jyldarǵa arnalǵan Lańkestikpen jáne ekstremızmniń ózge de zorlyq-zombylyq kórinistermen kúres jónindegi yntymaqtastyq baǵdarlamasynyń 2023 jyly júzege asyrý qorytyndysy týraly esep usynady. Munan bólek, is-shara barysynda qyzmettiń túrli baǵyty boıynsha keńestik jumys organdary otyrysyn ótkizý josparlanǵan.