Bishkekte Shoqan Ýálıhanov týraly derekti fılmniń tusaýkeseri ótti
ASTANA. KAZINFORM – Qyrǵyzstan astanasynda Qazaqstan Prezıdenti Qasym-Jomart Toqaevtyń Qyrǵyzstanǵa resmı saparyna oraı uıymdastyrylǵan is-sharalar aıasynda «Shoqan Ýálıhanov: Tarıhtyń jaryq juldyzy» atty derekti fılmniń premerasy ótti.
Іs-sharaǵa QR Mádenıet jáne aqparat mınıstri Aıda Balaeva, Qyrǵyz Respýblıkasy Memlekettik hatshysy Marat Imanqulov, Qyrǵyzstan Mádenıet, aqparat jáne jastar saıasaty mınıstriniń orynbasary Marat Taǵaev, «Manas» ulttyq akademııasynyń prezıdenti Azız Bımyrza ýýlý, sondaı-aq ǵylymı jáne shyǵarmashylyq zııaly qaýym ókilderi men jastar qatysty.
Fılmdi «Manas» ulttyq akademııasy qyrǵyzstandyq Barsbek Global Production kınostýdııasymen birlesip túsirgen. Ol uly oıshyl ári aǵartýshy Shoqan Ýálıhanovqa arnalǵan.
QR Mádenıet jáne aqparat mınıstri Aıda Balaeva is-sharaǵa qatysty pikir bildirdi.
- Osyndaı jobalar arqyly jas urpaq tarıhı tulǵalar men olardyń eńbekteri jaıly kóbirek biledi. Bul eńbekter eki baýyrlas halyqtyń jaqyndasýyna yqpal etti. Árıne, munyń barlyǵy elder arasyndaǵy yntymaqtastyqty nyǵaıtýǵa oń áser etedi. Shoqan Ýálıhanovtyń tarıhty, etnografııany, mádenıetti zertteýdegi jáne eń bastysy qyrǵyzdyń «Manas» eposyn nasıhattaýdaǵy róli men úlesin atap ótý mańyzdy. Onyń eńbekteri baýyrlas memleketterdiń birligin kúsheıtýge qyzmet etti. Biz Qazaqstan men Qyrǵyzstan arasyndaǵy dostyqtyń máńgi ári myzǵymas ekenin bilemiz. Qyrǵyz halqyna ósip-órkendeý, tabys, qarqyndy damý, beıbitshilik pen turaqtylyq tileımin, - dedi mınıstr.
Qyrǵyzstannyń Memlekettik hatshysy Marat Imanqulov Shoqan Ýálıhanovtyń qyrǵyz halqy tarıhyndaǵy mańyzdy rólin atap ótti.
- Shoqan Ýálıhanov - Qazaqstannyń kórnekti aǵartýshylarynyń biri. Ol qyrǵyz mádenıetiniń damýyna, sonyń ishinde shyǵarmashylyq salasyna ólsheýsiz úles qosty. Eń alǵashqylardyń biri bolyp «Manas» eposyn jazyp alyp, ony ǵylymı ortaǵa tanystyrdy. Qyrǵyz kıno mamandary túsirgen bul fılmde ǵalym eńbekterinde sıpattalǵan qyrǵyz halqynyń ómiri, turmysy men dástúrleri kórinis tapqan. Bul onyń halqymyz tarıhyndaǵy erekshe ornyn taǵy da aıqyndaıdy. Fılm óte unady. Memleketterimizdiń dostyǵy shynaıy. Biz bárimiz bilemiz jáne senimdimiz, bul qatynas máńgi. Munyń aıqyn dáleli - Qazaqstan Prezıdenti Qasym-Jomart Toqaevtyń Qyrǵyzstanǵa resmı sapary aıasynda ótip otyrǵan is-sharalar, - dedi qyrǵyz memlekettik hatshysy.
Fılmniń prodıýseri Nýrıza Chyntemırova týyndyny jasaý ıdeıasymen bólisti.
- Ideıa kópten beri oıda júrgen. Stsenarııdi ázirleý ótken jyly bastaldy, al bıyl ol ás júzinde júzege asty. Túsirilim men kartınany montajdaýǵa shamamen 1,5 aı ýaqyt ketti. Jobaǵa úlken qoldaý kórsetken «Manas» ulttyq akademııasy boldy. Olar arhıvtik derekterdi jınaýǵa jáne materıaldardy fılmde qoldanýǵa kómektesti. Shoqan Ýálıhanov - «Manas» eposyn arab áripterimen qaǵazǵa qolmen jazyp alǵan alǵashqy zertteýshiler men manasshylardyń biri. Fılmde ǵalymnyń Ystyqkólge jasaǵan ekspedıtsııasynyń mańyzdy sátterin ashyp kórsetýge tyrystyq, - dedi ol.
Aıta keteıik, búgin Qasym-Jomart Toqaev Qyrǵyz Respýblıkasyna resmı saparmen bardy.