Bishkekte ShYU sammıti kezinde 15 myńnan astam tártip saqshysy qoǵamdyq tártipti qadaǵalaıdy
ASTANA. KAZINFORM - Qyrǵyzstan astanasynda Shanhaı yntymaqtastyq uıymy sammıti men VI Dúnıejúzilik kóshpendiler oıyndarynyń ashylý rásimi ótetin kezeńde mılıtsııa kúsheıtilgen rejımde jumys isteıdi, dep habarlaıdy Kazinform agenttiginiń Bishkektegi menshikti tilshisi.
Bishkek qalasynyń ІІB málimetinshe, qoǵamdyq tártip pen azamattardyń, resmı delegatsııalar músheleriniń, halyqaralyq is-sharalarǵa qatysýshylar men qala qonaqtarynyń qaýipsizdigin qamtamasyz etýge ishki ister organdarynyń 15 myńnan astam qyzmetkeri jumyldyrylady.
Bılik qala turǵyndary men qonaqtarynan kúsheıtilgen qaýipsizdik sharalaryna, sondaı-aq kólik qozǵalysyna engiziletin ýaqytsha shekteýler men ádettegi baǵyttardyń ózgerýine túsinistikpen qaraýdy surady.
Azamattarǵa qoǵamdyq tártipti saqtap, mılıtsııa qyzmetkerleriniń zańdy talaptaryn oryndaý usynyldy. Sondaı-aq qala ishinde júrip-turý baǵytyn aldyn ala josparlap, jol qozǵalysyna qatysýshylardyń barlyǵyna qurmetpen qaraýǵa shaqyryldy.
Eske sala keteıik, 31 tamyz-1 qyrkúıek kúnderi Bishkekte Qyrǵyzstannyń tóraǵalyǵymen ShYU-ǵa múshe memleketter basshylary keńesiniń otyrysy ótedi.
31 tamyzda jańa «Bishkek Arena» stadıonynda VI Dúnıejúzilik kóshpendiler oıyndarynyń ashylý saltanaty ótedi.
Oıyndardyń negizgi sporttyq, mádenı jáne ǵylymı baǵdarlamasy 2-6 qyrkúıek aralyǵynda Ystyqkól oblysynyń Cholpon-Ata qalasy men Qyrchyn shatqalynda jalǵasady.
Buǵan deıin BUU Bas hatshysy Antonıý Gýterrıshtiń Bishkekte ótetin ShYU sammıtine qatysatyny habarlanǵan bolatyn.
Sondaı-aq Qytaı tóraǵasy Sı Tszınpınniń Qyrǵyzstan prezıdenti Sadyr Japarovtyń shaqyrýymen 30 tamyzda elge memlekettik saparmen keletini habarlandy.
ShYU sammıti men VI Dúnıejúzilik kóshpendiler oıyndaryna daıyndyq jáne olardy ótkizý kezeńinde Qyrǵyzstanda qaýipsizdik sharalary kúsheıtiledi.
Sammıt kezinde Bishkek turǵyndaryna qaladan ýaqytsha ketý usynyldy.
Sonymen qatar qaýipsizdikti qamtamasyz etý jáne kólik júıesine túsetin júktemeni azaıtý úshin 31 tamyz ben 1 qyrkúıekte Bishkekte resmı delegatsııalar júretin baǵyttar boıyndaǵy iri saýda ortalyqtary, bazarlar men birqatar jerasty ótkeli jabylady.
Aıta keteıik, Qyrǵyzstanda Kóshpendiler oıyndaryna daıyndyq qyzý júrip jatyr.
