Bishkekte «Ortalyq Azııa + AQSh» ekinshi bıznes forýmy ótip jatyr

Іskerlik is-sharanyń kún tártibine qarjy jáne bank sektorlary, mańyzdy mıneraldar, aýyl sharýashylyǵy, kólik jáne logıstıka, týrızm, elektrondyq kommertsııa jáne IT salasyndaǵy negizgi máseleler boıynsha ekonomıkalyq yntymaqtastyqty talqylaý, sondaı-aq usynystar ázirleý kiredi.

- Ortalyq Azııa – Qurama Shtattar úshin basymdyqty aımaq. B5+1 forýmy – yntymaqtastyqty nyǵaıtýdyń mańyzdy alańy. AQSh Ortalyq Azııa elderimen ekonomıkalyq qatysýyn jáne tehnologııalyq yntymaqtastyǵyn keńeıtýge múddeli. Bizde eń jaqsy tehnologııalar men múmkindikter bar jáne biz osy aımaqtyń elderi jáne seriktesterimen jumys istegimiz keledi, - dedi AQSh-tyń Ońtústik jáne Ortalyq Azııa isteri jónindegi arnaıy elshisi Serhıo Gor óz sózinde.

Qazaqstan Respýblıkasy Indýstrııa jáne qurylys mınıstri Ersaıyn Naǵaspaevtyń atap ótýinshe, qazirgi B5+1 bıznes forýmy Ortalyq Azııanyń jahandyq ekonomıkalyq kartadaǵy orny artyp kele jatqan kezeńde ótip jatyr.

- Biz búgingi bıznes forýmdy abstraktili dıalog retinde emes, ekonomıkalyq damý, ınvestıtsııalyq ósim jáne tehnologııalyq jańǵyrtýdyń praktıkalyq tetigi retinde qarastyryp otyrmyz. Aımaq pen Qurama Shtattar arasyndaǵy yntymaqtastyq praktıkalyq iskerlik ózara árekettesý, ınvestıtsııalar jáne naqty ekonomıkalyq nátıjelerge baǵyttalyp qarqyndy damyp keledi. Bizdiń aımaǵymyz ózara baılanysty ekonomıkalyq keńistik retinde qalyptasyp jatyr. Saýda baılanystary keńeıip, logıstıkalyq baǵyttar damyp keledi. Bıznes aımaqty tek jeke elder boıynsha ǵana emes, biryńǵaı, keń naryq retinde qarastyra bastady, - dedi ol.

Spıker B5+1 mehanızmi óziniń praktıkalyq tıimdiligin dáleldegenin atap ótti.

- Kóptegen amerıkalyq kompanııalar, sonyń ishinde Qazaqstan aımaqty ózderiniń aımaqtyq jobalarynyń bazasy retinde paıdalanady jáne biz bul platformanyń rólin aımaqtyń jalpy ekonomıkalyq damýyna qosqan mańyzdy úlesi retinde qarastyryp otyrmyz. Ortalyq Azııa úshin amerıkalyq bıznespen yntymaqtastyq tek ınvestıtsııalardyń aǵynyn ǵana emes, sonymen qatar tehnologııalar, jahandyq standarttar, basqarý salasyndaǵy tájirıbe jáne halyqaralyq qundylyqtar tizbegine qol jetkizýdi bildiredi, - dep atap ótti Ersaıyn Naǵaspaev.

Qyrǵyz Respýblıkasy Mınıstrler kabıneti tóraǵasynyń birinshi orynbasary Danııar Amangeldıev Ortalyq Azııany birtutas turaqty jáne serpindi damyp kele jatqan, ınvestıtsııalar men tehnologııalarǵa ashyq aımaq retinde sıpattady.

Onyń aıtýynsha, V5+1 formaty – 2025 jyly Ortalyq Azııa-AQSh kóshbasshylarynyń sammıtinde qol jetkizilgen kelisimderdi naqty jobalar men seriktestikter arqyly júzege asyrýdyń praktıkalyq platformasy.

- 2025 jyldyń 6 qarashasynda Vashıngtonda ótken Ortalyq Azııa jáne Qurama Shtattar kóshbasshylarynyń sammıti yntymaqtastyqtyń aıqyn jáne ambıtsııaly vektoryn belgiledi. Búginde biz ony naqty mazmunmen tolyqtyryp, ıdeıalardy bastamalarǵa, baılanystardy turaqty seriktestikke, al nıetti elderimizdiń damýyn ilgeriletetin sheshimderge aınaldyrýymyz kerek, - dep atap ótti ol.

Óz kezeginde, Eurasia Group AG kompanııasynyń operatsııalyq dırektory Sergeı Glokke sońǵy jyldary AQSh pen Ortalyq Azııa memleketteri arasyndaǵy yntymaqtastyqtyń artyp kele jatqanyn atap ótti.

- Eýrazııa Grýpp Qazaqstan – Qazaqstandaǵy John Deer kompanııasynyń resmı dıleri. Ótken jyly biz seriktesimiz «Agromashholdıng KZ» AQ-men Qazaqstanda ınvestıtsııasy 2,5 mlrd dollar bolatyn aýyl sharýashylyǵy tehnıkasyn qurastyrý zaýyty týraly strategııalyq kelisimge qol qoıdyq. John Deer qazir tikeleı Qazaqstanda óndirilip jatyr. B5+1 platformasy bizge osy yntymaqtastyqtyń tabysyn nyǵaıtýǵa múmkindik beredi. Joba sondaı-aq Qazaqstannyń ónerkásip ónimderiniń eksporttyq áleýetin damytý úshin óte mańyzdy. Búginde Qazaqstannan Qyrǵyzstanǵa jetkizýdiń áleýeti qarastyrylyp otyr. Amerıkalyq kompanııalar Ortalyq Azııaǵa úlken qyzyǵýshylyq tanytyp keledi, - dep túıindedi ol.

Іs-shara eki kúnge sozylady. Dıalog alańynyń qorytyndylary bıznes jáne ınvestıtsııalyq ortany jaqsartý úshin memlekettik organdar men jeke sektor arasyndaǵy kelisimderdiń jańartylǵan kún tártibin qamtıdy dep kútiledi.

Buǵan deıin Almatyda AQSh pen Ortalyq Azııa elderi arasyndaǵy «V5+1» platformasy resmı iske qosylatynyn jazdyq.