Bishkekte meıramhanalar, barlar men klýbtar keshki saǵat 22:00-den keıin jabylady

BІShKEK. KAZINFORM – Qyrǵyzstan astanasynda tynyshtyq týraly zań talaptary kúsheıtildi, dep habarlaıdy Kazinform menshikti tilshisi.

Bishkek merııasynyń buıryǵyna sáıkes, el astanasyndaǵy barlyq mádenı jáne oıyn-saýyq oryndary, sonyń ishinde dámhanalar, meıramhanalar, barlar, klýbtar jáne banket zaldary keshki saǵat 22:00-den jumysyn aıaqtaýy tıis.

- Elektr qýaty arqyly jumys isteıtin, ásirese energııany kóp tutynatyn barlyq qurylǵylar (elektr plıtalary, jylytqyshtar, peshter jáne t.b.) keshki saǵat 10:00-den keıin óshirilýi tıis, - delingen habarlamada.

Atalǵan ýaqyttan keıin qatty mýzyka, jaryqtandyrý nemese tynyshtyqty buzatyn basqa da árekettermen baılanysty shýly is-sharalarǵa tyıym salyndy.

Sonymen birge, eger mekemeler turǵyn úılerden alys ornalasqan bolsa jáne tolyq tynyshtyq saqtalǵan jaǵdaıda elektr generatorlaryn paıdalanýǵa ruqsat etiledi. Talaptardyń oryndalýy turaqty reıdter arqyly qadaǵalanatyn bolady.

Buǵan deıin Qyrǵyzstan Respýblıkasy Ulttyq qaýipsizdik memlekettik komıtetiniń basshysy Qamchybek Tashıev jergilikti telearnaǵa bergen suhbatynda tynyshtyq týraly zańǵa sáıkes barlyq dámhanalar, meıramhanalar, banket zaldary, túngi klýbtar jáne oıyn-saýyq oryndary keshki saǵat 22:00-de jabylýy kerek ekenin málimdegen bolatyn.

Qala, aýdan jáne oblys gýbernatorlaryna zań talaptarynyń saqtalýyn qamtamasyz etý jáne keshki saǵat 22:10-nan keıin oıyn-saýyq oryndaryna elektr qýatyn óshirý tapsyryldy.

Buǵan deıin Qyrǵyzstanda elektr energııasyna shekteýsiz tarıfter alynatynyn jazǵan edik.

Sondaı-aq el boıynsha bilim berý mekemelerinde elektr energııasyn únemdeý sharalary engizilip otyr.