Bishkekte Qazaqstan men Qyrǵyzstannyń II óńiraralyq jıyny bastaldy
ASTANA. KAZINFORM — Bishkektegi «Ala-Archa» memlekettik rezıdentsııasynda Qazaqstan Respýblıkasy men Qyrǵyz Respýblıkasynyń II óńiraralyq yntymaqtastyq forýmy óz jumysyn bastady, dep habarlaıdy Kazinform agenttiginiń Bishkektegi menshikti tilshisi.
Forýmǵa Qazaqstan Premer-Mınıstri Oljas Bektenov pen Qyrǵyzstan Mınıstrler kabınetiniń tóraǵasy Ádilbek Qasymalıev teń tóraǵalyq etedi.
Jıynǵa eki eldiń memlekettik organdarynyń basshylary, óńirlik ákimdikter men iskerlik orta ókilderi, sondaı-aq damý uıymdarynyń ókilderi qatysyp jatyr.
Qazaqstan tarapynan forýmǵa Almaty, Jambyl, Shyǵys Qazaqstan, Aqmola, Qaraǵandy jáne Jetisý oblystary, sondaı-aq Almaty jáne Túrkistan qalasynan ókilder qatysady. Al Qyrǵyzstannan Ystyqkól, Shý, Jalal-Abad, Osh, Talas oblystary jáne Osh qalasynyń ókilderi kelgen.
Baǵdarlamada saýda-ekonomıkalyq baılanystardy damytýdaǵy óńirlerdiń róli men Qazaqstan jáne Qyrǵyzstan óńirleri arasyndaǵy baılanysty nyǵaıtýdaǵy týrızmniń mańyzy talqylanady. Qatysýshylar óńiraralyq yntymaqtastyqty keńeıtý, shekaraaralyq týrızmdi órkendetý jáne iskerlik baılanysty nyǵaıtý múmkindikterin qarastyrady.
Jıyn barysynda yntymaqtastyq týraly memorandýmdar men kommertsııalyq qujattarǵa qol qoıý jáne olarmen almasý rásimi ótedi.
Sondaı-aq eki eldiń kásipkerleri B2B formatynda kezdesip, tikeleı baılanys ornatý, iskerlik seriktester tabý jáne birlesken jobalardy júzege asyrý múmkindikterin talqylaıdy.
Buǵan deıin Oljas Bektenov Qyrǵyzstanǵa resmı saparmen kelgenin habarlaǵan edik.
