Bishkekte Qazaqstan men Qyrǵyzstan arasyndaǵy Parlamentaralyq keńes týraly erejege qol qoıyldy
ASTANA. KAZINFORM - Májilis tóraǵasy Erlan Qoshanov Qyrǵyz Respýblıkasyna resmı sapary aıasynda Jogorký Kenesh tóraǵasy Nýrlanbek Shakıevpen kezdesti, dep habarlaıdy QR Parlamenti Májilisiniń baspasóz qyzmeti.
Sondaı-aq Qazaqstan men Qyrǵyzstan parlamentteri arasyndaǵy yntymaqtastyq jónindegi Parlamentaralyq keńestiń ekinshi otyrysyna qatysty.
Jogorký Kenesh depýtattarymen kezdesý barysynda basty taqyryp – parlamentaralyq yntymaqtastyqty nyǵaıtý boldy. Májilis tóraǵasy eki memleket basshylary arasyndaǵy kelisimderdi zańnamalyq turǵyda qamtamasyz etý Qazaqstan men Qyrǵyzstan parlamentshileriniń basty mindeti ekenin atap ótti.
– Aǵaıyndy Qyrǵyzstan árdaıym elimizdiń senimdi strategııalyq seriktesi jáne solaı bolyp qala bermek. Sońǵy jyldary joǵary deńgeıdegi kezdesýlerdiń qarqyny da, mazmuny da yntymaqtastyǵymyzdyń odaqtastyq sıpatyn aıshyqtaıdy. Prezıdent Sadyr Japarovtyń bıylǵy Qazaqstanǵa jasaǵan resmı saparynyń tarıhı mańyzy zor boldy. Odaqtastyq qatynastardy tereńdetý men keńeıtý týraly memleketaralyq shart jáne birqatar mańyzdy salalyq kelisimge qol qoıyldy, – dedi Erlan Qoshanov.
Májilis spıkeri qyrǵyz áriptesterine Qazaqstanda Qasym-Jomart Toqaevtyń bastamasymen júrgizilip jatqan saıası ózgerister týraly aıtyp berdi. Ol sondaı-aq kóppartııaly Májilistiń VIII shaqyrylymdaǵy zańnamalyq qyzmeti týraly habardar etti. Ásirese, Qazaqstan qoǵamy úshin mańyzy zor «Ulttyq qor – balalarǵa», áıelder men balalardyń quqyqtaryn qorǵaý, qumar oıynǵa táýeldilik pen esirtki óndirisine qarsy kúres týraly zańdarǵa keńinen toqtaldy.
Májilis tóraǵasy eki el depýtattary arasynda eń ózekti máselelerdi jedel sheshýge múmkindik beretin turaqty jáne syndarly dıalog ornaǵanyn atap ótti.
Erlan Qoshanov TMD Parlamentaralyq Assambleıasy, EQYU Parlamenttik Assambleıasy, Ujymdyq qaýipsizdik sharty uıymynyń Parlamenttik Assambleıasy, Túrki memleketteri uıymynyń Parlamenttik Assambleıasy, sondaı-aq «Ortalyq Azııa – Koreıa Respýblıkasy» parlamentteri spıkerleriniń kezdesý formattary aıasynda yntymaqtastyqty odan ári nyǵaıtýǵa nıetti ekenin málimdedi. Ol Qazaqstan men Qyrǵyzstan arasyndaǵy parlamentaralyq yntymaqtastyqtyń ereksheligi retinde halyqaralyq bastamalardy ózara qoldaýdyń turaqtylyǵyna nazar aýdardy.
Kezdesý sońynda Májilis spıkeri Jogorký Kenesh tóraǵasy Nýrlanbek Shakıevke Qazaqstan Respýblıkasy men Qyrǵyz Respýblıkasy arasyndaǵy ekijaqty qarym-qatynasty nyǵaıtýǵa jáne damytýǵa qosqan eleýli úlesi úshin «Dostyq» ordenin tabystady. Jogorký Kenesh tóraǵasynyń orynbasary Nurbek Sydygalıevke Qurmet gramotasy berildi.
Parlamentaralyq yntymaqtastyq keńesiniń ekinshi otyrysynda depýtattar ekonomıka, ınvestıtsııa, sý energetıkasy, kólik, bilim berý jáne mádenı-gýmanıtarlyq salalardaǵy yntymaqtastyqty talqylady.
– Ekijaqty yntymaqtastyqtyń mańyzdy baǵyty – sý qaýipsizdigi. Bul saladaǵy tıimdi áriptestik sý resýrstaryn utymdy ári ádiletti paıdalanýǵa, taraptardyń múddelerin eskerýge jáne ózara mindettemelerdi oryndaýǵa negizdeledi. Bıyl birlese atqarǵan sharalardyń arqasynda sýarý maýsymy esh shyǵynsyz ótti, – dedi Erlan Qoshanov.
Depýtattar energetıka salasyndaǵy baılanysty damytý máselesin de talqylady. Májilis spıkeri bıyl jazda Qazaqstan, Qyrǵyzstan jáne Ózbekstan arasynda Kambar-Ata gıdroelektr stantsııasyn salý týraly úshjaqty kelisimge qol qoıylýy mańyzdy oqıǵa bolǵanyn atap ótti.
Mádenı-gýmanıtarlyq saladaǵy qarym-qatynas týraly aıta kele, Parlament tóraǵalary memleket basshylarynyń tapsyrmasymen mádenıet, buqaralyq aqparat quraldary, týrızm salalarynda birlesken jobalar sátti júzege asyrylyp jatqanyna toqtaldy. Jastar men stýdentter belsendi túrde tájirıbe almasyp jatyr. Búginde Qyrǵyzstanda Qazaqstannyń eki joǵary oqý ornynyń fılıaly jumys isteıdi.
Parlamentaralyq keńestiń ekinshi otyrysy sońynda Qyrǵyz Respýblıkasy Jogorký Keneshi men Qazaqstan Respýblıkasy Parlamenti arasyndaǵy yntymaqtastyq boıynsha Parlamentaralyq keńes týraly erejege qol qoıyldy.
Sonymen qatar sapar barysynda Májilis tóraǵasy men depýtattar 1916 jylǵy qaıǵyly oqıǵa kezinde qaza tapqandarǵa arnalǵan eskertkishke gúl shoqtaryn qoıyp, uly qyrǵyz jazýshysy Shyńǵys Aıtmatovtyń zıraty men murajaı-úıine bardy.
Resmı sapardyń ekinshi kúnine Erlan Qoshanovtyń Qyrǵyz Respýblıkasy Prezıdenti Sadyr Japarovpen kezdesýi josparlanǵan.
