Bishkekte Qazaqstan kınosy kúnderi bastaldy
ASTANA. KAZINFORM — Bishkektegi «Ala-Too» kınoteatrynda 28–30 qyrkúıek aralyǵynda Qazaqstan kınosy kúnderi ótip jatyr, dep habarlaıdy Kazinform agenttiginiń Bishkektegi menshikti tilshisi.
Іs-sharanyń resmı ashylýynda Qyrǵyz Respýblıkasynyń Mádenıet, aqparat jáne jastar saıasaty mınıstrligi janyndaǵy Kınematografııa departamentiniń dırektory Talantbek Tolobekov Bishkektegi tarıhy tereń, eń kóne kınoteatrlardyń birinde Qazaqstan kınosy kúnderin ótkizý Qyrǵyzstan úshin úlken mártebe ekenin atap ótti.
— Eki eldiń kınematografııasy týraly sheksiz aıtýǵa bolady. Bul – ondaǵan jyl boıy jalǵasyp kele jatqan berik baılanys. Bizdiń tamyrymyz tereń, dástúrimiz berik. Qyrǵyzstan táýelsizdik alǵan kezde eldegi alǵashqy prodıýserler qazaqstandyq áriptester boldy, sonymen qatar qyrǵyz rejısserleri Qazaqstanda jumys isteı bastady. Álemdik kınematografııa tarıhyna engen kóptegen birlesken jobalarymyz paıda boldy. Búgin Qazaqstan kınosy kúnderiniń ashylýynda kórsetilip otyrǵan fılm 2026 jylǵy Bishkek kınofestıvali baǵdarlamalarynyń biriniń jeńimpazy atandy. Halyqaralyq jáne Ortalyq Azııa qazylar alqasy qazaqstandyq kınonyń joǵary deńgeıin jáne áriptesterimizdiń kásibı sheberligin atap ótti, — dedi Talantbek Tolobekov.
Qazaqstannyń Qyrǵyzstandaǵy Elshiliginiń keńesshi-elshisi Ashat Syzdyqov quttyqtaý sózinde qonaqtarǵa qatysqany úshin alǵys bildirip, kınematografııa arqyly mádenı almasýdy damytý Qazaqstan men Qyrǵyzstan arasyndaǵy gýmanıtarlyq baılanystardy odan ári nyǵaıtý úshin erekshe mańyzǵa ıe ekenin atap ótti.
«Qazaqfılm» ulttyq kınostýdııasy» aktsıonerlik qoǵamynyń Kınoóndiris jáne dýblıaj bóliminiń bas mamany Botagóz Aımambetovanyń aıtýynsha, Bishkekte Qazaqstan kınosy kúnderin ótkizýdegi maqsat – Qazaqstan men Qyrǵyzstan arasyndaǵy óner jáne mádenı mura salasyndaǵy tájirıbe almasý, sondaı-aq eki eldiń kınoındýstrııasymen tanystyrý.
Іs-sharanyń ashylýynda fantastıka elementteri bar «Qaitadan» fılmi kórsetildi. Tolyqmetrajdy kartınanyń rejısseri – Dýman Erkimbek. Bul – Qazaqstan kınematografııasy tarıhyndaǵy apattar janryndaǵy alǵashqy týyndy.
Fılmde ata-anasymen janjaldasqannan keıin ájesiniń aýylyna barǵan qalalyq jasóspirim Raýannyń oqıǵasy baıandalady. Sol jerde ol ýaqyt ilmegine túsedi: bir kún qaıta-qaıta qaıtalana beredi, al oqıǵa bógettiń joıqyn buzylýymen aıaqtalady. Apattyń aldyn alyp, jaqyndaryn qutqarýǵa tyrysqan keıipker ishki ózgeristen ótip, ómirge degen kózqarasyn qaıta qarastyrady.
Fılm Qazaqstan Respýblıkasynyń Mádenıet jáne aqparat mınıstrligi men Ulttyq kınony qoldaý memlekettik ortalyǵynyń qoldaýymen túsirilgen. Fılm 2025 jylǵy qyrkúıekte keń prokatqa shyqty.
Nýbolot esimdi jas kórermen fılmdi tamashalaǵannan keıingi áserimen bólisti.
— Maǵan fılm óte unady. Basynda oqıǵanyń únemi qaıtalana berýine baılanysty fılmdi túsiný qıyn boldy. Sheshimi óte keremet boldy. Jaǵymdy emotsııaǵa bólendim. Fılmniń berilýi men akterlerdiń oıyny joǵary deńgeıde, — dedi ol.
Kanyshaı esimdi qala turǵynynyń pikirinshe, búgingi kórsetilim kórermendi basynan aıaǵyna deıin erekshe áserde ustady. Fılmdi tamashalaý barysynda zaldaǵy kórermender kúlkiden kóz jasyna deıin túrli emotsııany bastan ótkerdi.
— Jigittiń bárin qutqaryp qalǵan fılmniń jaqsy aıaqtalǵanyna qýandyq. Túsirilim tobyna alǵysymyzdy bildiremiz. Keremet shyqqan, — dedi ol.
Qazaqstan kınosy kúnderi 29–30 qyrkúıekte «Altyn adam» tolyqmetrajdy anımatsııalyq fılmi men «Jabaıy» otbasylyq fılmin tegin kórsetýmen jalǵasady.
2026 jylǵy mamyrda Bishkektegi Ǵapar Aıtıev atyndaǵy Memlekettik beıneleý óneri mýzeıinde qazaqstandyq sýretshiler Úmiraly Ismaılov pen Májıt Baıtenovtiń «Uly dala ańyzdary» atty kartınalar kórmesi ótken bolatyn.
