Bishkekte qazaq-qyrǵyz qarym-qatynasynyń aldaǵy josparlary talqylandy
ASTANA. KAZINFORM – Qyrǵyzstan Mınıstrler kabıneti tóraǵasynyń orynbasary – Sý resýrstary, aýyl sharýashylyǵy jáne qaıta óńdeý ónerkásibi mınıstri Erlıst Akýnbekov elimizdiń Qyrǵyzstandaǵy elshisi Rapıl Joshybaevpen kezdesti. Bul týraly Kabar agenttigi jazdy.
Kezdesý barysynda qyrǵyz-qazaq yntymaqtastyǵynyń keń aýqymdy máseleleri talqylandy.
Qyrǵyzstan Prezıdenti Sadyr Japarov pen Qazaqstan Prezıdenti Qasym-Jomart Toqaev arasyndaǵy kezdesýlerde qol jetkizilgen kelisimderdi iske asyrýdyń mańyzdylyǵyna erekshe nazar aýdaryldy.
Taraptar saýda-ekonomıkalyq baılanystarǵa basymdyq bere otyryp, ekijaqty ózara is-qımyldy odan ári damytýǵa daıyn ekenderin jetkizdi.
Aýyl sharýashylyǵy, ınfraqurylym, logıstıka, sý-energetıka kesheni salalaryndaǵy jobalardy júzege asyrýǵa qoldaý kórsetýdiń mańyzdylyǵy atap ótildi.
Mınıstrler kabıneti tóraǵasynyń orynbasary Erlıst Akýnbekov Qyrǵyzstan men Qazaqstan arasyndaǵy strategııalyq áriptestik pen odaqtastyq qatynastar ózara qyzyǵýshylyq týdyratyn barlyq máseleler boıynsha senimdi dıalog pen tıimdi yntymaqtastyqtyń negizi bolatynyna senim bildirdi.
Kezdesý sońynda eki taraptyń qatysýymen ótetin joǵary jáne eń joǵary deńgeıdegi aldaǵy is-sharalardyń kestesi, sondaı-aq sharttyq-quqyqtyq bazany keńeıtý máseleleri qaraldy.
Eske sala ketsek, buǵan deıin Májilis qazaq-qyrǵyz shekarasyndaǵy ótkizý pýnkteri týraly kelisimge ózgeris engizgenin jazdyq.
