Bishkekte qarýly jıhadqa shaqyrǵan dinı top músheleri ustaldy

ASTANA. KAZINFORM — Qyrǵyz Respýblıkasynyń Ulttyq qaýipsizdik memlekettik komıteti radıkaldy takfırıstik-djıhadıstik baǵyttardy nasıhattaǵan dinı topty anyqtady, dep habarlaıdy Kazinform tilshisi.

Arnaıy qyzmettiń málimetinshe, top músheleri radıkaldy-ekstremıstik kózqarastardy taratyp, óz ortasynda úgit-nasıhat júrgizgen. Olar zorlyq-zombylyqqa shaqyratyn materıaldardy taratyp, basqa aǵymdar men din ókilderine tózimsizdik tanytýdy nasıhattaǵan.

— Atalǵan tulǵalardyń áreketteri Bishkek qalasynda terrorıstik jerasty uıymyn qurýǵa baǵyttalýy múmkin degen negiz bar, — delingen Ulttyq qaýipsizdik memlekettik komıteti habarlamasynda.

2025 jylǵy 11 maýsymda sot sanktsııasymen Bishkek qalasyndaǵy on mekenjaı boıynsha tintý júrgizildi. 10-nan astam adam Qyrǵyzstan UQMK-ǵa jetkizildi.

Tintý barysynda tirkelmegen dinı ádebıetter, ekstremıstik sıpattaǵy sımvolıka, 1 jaýyngerlik granata, ártúrli tańbalary bar 3 oq-dári, 1 tegis uńǵyly myltyq, M16/M4 avtomatyna uqsas straıkbol qarýy, 1 sıgnaldy tapansha, 2 pnevmatıkalyq tapansha, aqsha, pyshaqtar, qylyshtar, baılanys quraldary jáne radıkaldy mazmundaǵy aýdıo-beınematerıaldar tárkilendi.

— Tsıfrlyq qurylǵylardy taldaý men sot-saraptamalyq dintaný qorytyndysy radıkaldy-ekstremıstik sıpattaǵy aýdıo-beınejazbalardyń bar ekenin rastady. Onyń ishinde qarýly jıhad pen lańkestik áreketterge shaqyrý, tyıym salynǵan halyqaralyq terrorıstik uıymdardyń qyzmetinde qoldanylatyn materıaldar anyqtaldy, — dep habarlady vedomstvo.

Nátıjesinde, shetel azamaty Ý.D.A. men Qyrǵyzstan azamaty L.D.V. ustalyp, SIZO-21 mekemesine qamaýǵa alyndy. Qalǵan tulǵalarmen profılaktıkalyq jumystar júrgizilgennen keıin olar bosatyldy.

Buǵan deıin Qyrǵyzstan azamattaryna AQSh-qa kirýge tyıym salynýy múmkin ekeni aıtyldy.