Bishkekte halyqaralyq fýtbol ortalyǵyn ashý josparlanyp otyr
BІShKEK. KAZINFORM – Ystyqkól oblysynda halyqaralyq oqý-jattyǵý kesheni salynady. Ol jergilikti sportshylar men jattyqtyrýshylar úshin jattyǵý alańy retinde qyzmet etedi, dep habarlaıdy Kazinform agenttiginiń Bishkektegi menshikti tilshisi.
Qyrǵyzstan Respýblıkasynyń Investıtsııalar jónindegi Ulttyq agenttiginde Juventus Academy Kyrgyzstan jobasyn iske asyrý boıynsha keńes ótti.
Onyń málimetinshe, Bishkekte balalar men jasóspirimderge arnalǵan fýtbol ortalyǵyn salý josparlanyp otyr. Sporttyq-bilim berý keshenine fýtbol alańdary, jabyq manej jáne 250-400 oqýshyǵa arnalǵan mektep kiredi. Ortalyq úshin aýdany 3-5 gektar jer ýchaskesin bólý josparlanǵan.
Atalǵan bastama aıasynda Ystyqkól oblysynda jergilikti sportshylar men jattyqtyrýshylar úshin oqý-jattyǵý bazasy men jattyǵý ortalyǵy retinde qyzmet etetin halyqaralyq oqý-jattyǵý kesheni salynady.
Otyrysta jer ýchaskesin tańdaý, jobany iske asyrý tetikteri jáne memlekettik organdarmen odan ári ózara is-qımylǵa qatysty máseleler qarastyryldy.
Eske sala ketsek, 2023 jyldyń tamyz aıynda Jalal-Abadta TMD-daǵy alǵashqy jáne ıspandyq «Barselona» klýbynyń 29-shy fýtbol akademııasynyń saltanatty ashylýy ótti.
Osyǵan deıin Qyrǵyzstan 2028 jylǵy Azııa kýbogyn ótkizýge ótinim bergenin habarladyq.
Sondaı-aq Evander Holıfıld Qyrǵyzstanda boks akademııasyn ashýdy josparlap otyrǵanyn jazdyq.
