Bishkekte «Ǵasyrlar izimen: Qazaqstan tarıhynyń beınesi» atty halyqaralyq fotokórme ashyldy
ASTANA. KAZINFORM – Qyrǵyz Respýblıkasynyń Ulttyq tarıhı mýzeıinde Qazaqstannyń tarıhı-mádenı murasyna arnalǵan eki aptalyq halyqaralyq fotokórme ashyldy.
Іs-sharany Qazaqstan Respýblıkasynyń Mádenıet jáne aqparat mınıstrligine qarasty Mádenıet komıteti, Qazaqstan Respýblıkasynyń Ortalyq memlekettik mýzeıi, Qyrǵyz Respýblıkasynyń Ulttyq tarıhı mýzeıi jáne Qazaqstannyń Qyrǵyzstandaǵy Elshiligi uıymdastyrdy.
Ortalyq memlekettik mýzeıdiń ǵylymı qyzmetkeri Nazgúl Asylbekova atap ótkendeı, kórme qyrǵyz jurtshylyǵyn qazaq halqynyń baı tarıhymen jáne rýhanı murasymen tanystyrýdy maqsat etedi.
– Bul kórmede Shoqan Ýálıhanov, Ahmet Baıtursynuly, Qanysh Sátbaev, Ámire Qashaýbaev, Dına Nurpeıisova, Kúlásh Baıseıitova sııaqty qazaqtyń uly tulǵalary týraly tyń fotomaterıaldar usynylǵan. Sondaı-aq fotosýretter arqyly qazaq halqynyń dástúrli ómir salty men mádenıeti kórsetiledi. Kórme arqyly til, mádenıet, tarıh jáne dástúri uqsas eki baýyrlas eldiń dostyǵyn qazirgi urpaqqa taǵy bir márte pash etýdi kózdeımiz, – dedi ol.
Nazgúl Asylbekovanyń aıtýynsha, kórmeniń erekshe bóligi – qazaq mádenıetiniń kórnekti ókilderi Abaı Qunanbaıuly, Jambyl Jabaev, Dına Nurpeıisova jáne Kenen Ázirbaev paıdalanǵan mýzykalyq aspaptardyń dál kóshirmeleri.
– Bul bizdiń mýzeı ázirlegen arnaıy joba. Kelýshiler qazaq halqynyń mádenı murasymen jaqynyraq tanysyp, tarıhty sezinip, mýzykalyq aspaptarǵa qol tıgizip, olardyń únimen rýhanı baılanys ornata alady, – dedi mýzeı qyzmetkeri.
Qyrǵyz Respýblıkasy Ulttyq tarıhı mýzeıiniń dırektory Jyldyz Bakashova mádenı is-sharanyń mańyzyna toqtaldy.
– Búgin bizdiń mýzeıde Qazaqstan Ortalyq memlekettik mýzeıiniń qoryndaǵy biregeı fotomaterıaldar negizinde ázirlengen kórme ashylyp otyr. Ol qazaq halqynyń baı ári kópǵasyrlyq tarıhyn, kóshpeli dástúrlerinen bastap HH ǵasyrdaǵy mádenı jetistikterge deıingi jolyn baıandaıdy. Árbir sýret – qazaq halqynyń rýhy men danalyǵynyń, jasampaz kúshiniń tiri kýási. Taǵy bir aıta keterligi, bul kórme bizdiń mýzeıdegi «Ashyq esik aıymen» tuspa-tus kelip otyr. Kún saıyn 10-17 myńǵa deıin kelýshi qabyldaımyz. Sondyqtan bul kórme baýyrlas halyqtyń tarıhı-mádenı murasymen tanysýǵa zor múmkindik beredi dep senemin, – dedi ol.
Kórmeniń ashylý saltanatynda qonaqtarǵa «Orteke» dástúrli oryndaýshylyq óneri usynyldy. Bul – dombyra únimen birge aǵashtan jasalǵan serke beınesiniń bıleýi arqyly oryndalatyn erekshe sahnalyq qoıylym.
2024 jyly 100 jas dombyrashy «Orteke» kúıin shertip, Gınnestiń rekordtar kitabyna endi.