Bishkekte elektr qýatynyń neden sóngeni belgili boldy

ASTANA. KAZIMFORM – «Qyrǵyzstannyń ulttyq elektr jelisi» kompanııasy Bishkek pen Chý oblysynyń keıbir aýdandarynda elektr jaryǵynyń jappaı sónýine ne sebep bolǵanyn málim etti, dep habarlaıdy Kazinform agenttiginiń menshikti tilshisi.

- Qysqy maýsymǵa daıyndyq aıasyndaǵy jóndeý jumystary kezinde elektr berý jelisiniń jekelegen bólikterinde ótkizý múmkindigi shekteýli bolyp, elektr qýatyn jetkizý ýaqytsha úzildi,-delingen QUEJ habarlamasynda.

Aldyn ala málimetter boıynsha, shtattan tys jaǵdaı «Kara-Balta»-Glavnaıa» VL-220 jelisiniń óshirilýinen boldy. Energetıkter elektr qýatyn berý jumystaryn qalpyna keltirý, bolǵan oqıǵanyń sebep-saldaryn anyqtaý, jaryqtyń qaıta sónýiniń aldyn alý boıynsha qajetti sharalardy jedel qolǵa aldy.

Qazirgi tańda energetıka júıesi shtattyq jaǵdaıda jumys istep tur. Táýlik boıyna monıtorıng júrgizilip, tutynýshylardy turaqty ári senimdi túrde elektr qýatymen qamtamasyz etý baǵytynda barlyq qajetti sharalar qolǵa alyndy.

Aıta keteıik, 18 maýsym kúni Qyrǵyzstan astanasynyń birneshe aýdanynda jaryq óship qaldy. Turǵyn úıler, ákimshilik ǵımarattar, áleýmettik nysandar, halyqqa qyzmet kórsetý ortalyqtary jaryqsyz qaldy.

Biraz ýaqyttan keıin Bishkektiń keıbir aýdandarynda elektr qýaty berile bastady.