Bishkekte bolǵan TMD elderi basshylarynyń keńesinde tórt qujat qabyldandy
2023 jyldyń 13 qazanynda Bishkekte Qyrǵyz Respýblıkasynyń prezıdenti Sadyr Japarovtyń tóraǵalyǵymen TMD elderi basshylarynyń kezekti keńesi ótti. Kazinform bul týraly Kabar agenttigine silteme jasap habarlaıdy.
Olar tórt qujatqa qol qoıdy.
Memlekettik basqarmany tsıfrlandyrý salasyndaǵy seriktestik týraly qujat TMD-ǵa múshe memleketterdiń aqparattyq qaýipsizdigin qamtamasyz etý men memlekettik qyzmet kórsetý tıimdiligin arttyrýǵa, tsıfrlandyrý jaǵdaıynda adam quqyqtarynyń saqtalýyn qamtamasyz etýge septigin tıgizetin memlekettik sektordy tsıfrlyq transformatsııalaý yntymaqtastyǵyn tereńdetýge baǵyttalǵan.
Kóppolıarly álemdegi halyqaralyq qatynastar týraly qujat TMD elderinde halyqaralyq jáne óńirlik damý máselelerin sheshý úshin qaýipsiz halyqaralyq qatynas qurylymyn jasaýǵa arnalǵan. Qujatta TMD aımaǵyn beıbitshilik, seriktestik, turaqty damý men ortaq gúldený aımaǵyna aınaldyrý atalyp ótken.
Memleket basshylarynyń adam quqyqtaryn jáne dinı senimin qorǵaý týraly qujatynda TMD elderinde mádenı jáne dinı ustanymy túrli adamdar turatynyn túsinýdiń mańyzy aıtylǵan.
Orys tilin ultaralyq qatynas tili retinde qoldaý jáne damytý qujatynda onyń álemdegi, BUU jáne birqatar basqa halyqaralyq uıymnyń resmı tili retindegi róli, TMD elderiniń biregeı tildik jáne tarıhı-mádenı murasyn saqtaý jáne tanytý týraly aıtylyp, Dostastyqtyń ortaq mádenı-gýmanıtarlyq keńistigin nyǵaıtýdaǵy orys tiliniń mańyzy atalyp ótken. Sondaı-aq qujatta orys tilin ózara tildesýde jáne halyqaralyq uıym men forýmdarda paıdalanyp, tiline qaraı kemsitýge jol berilmeýi kerek ekeni naqtylanǵan.
Qyrǵyz astanasynda qol qoıylǵan qujattyń bári Birikken Ulttar Uıymy men basqa da halyqaralyq uıymdarǵa taratylady.
TMD memleketteri basshylarynyń keńesi «Odaqtyń mádenı astanalary» Memleketaralyq baǵdarlamasyn Ózbekstan Respýblıkasynda júzege asyrý týraly sheshim qabyldap, Samarqandty Odaqtyń 2024 jylǵy Mádenı astanasy dep jarııalady.
