Bishkekte arnaıy operatsııa kezinde qylmystyq avtorıtet Qamshy Kólbaev qaza tapty
Qyrǵyzstanda atyshýly qylmystyq avtorıtet Qamshy Kólbaevty (Qamshybek Asanbek) ustaýǵa baǵyttalǵan arnaıy operatsııa aıaqtaldy. Onyń barysynda qaza tapqandardyń máıiti máıithanaǵa jetkizildi, dep habarlaıdy QazAqparat 24.kg resýrsyna silteme jasap.
Bishkektegi respýblıkalyq patologoanatomııa bıýrosy ǵımaratyna polıtsııanyń súıemeldeýimen jedel járdem kóligi kirdi.
Olar arnaıy operatsııa kezinde qaza tapqan Qamshy Kólbaevtyń denesin ákelgeni habarlandy.
Keıin máıithana aýmaǵyna taǵy bir jedel járdem kóligi kirdi. Kim ákelingeni týraly málimet joq.
Aıta keteıik, buǵan deıin bul aýmaqty polıtsııa qorshaýǵa alǵan bolatyn.
Ǵımarattan bógde adamdardyń bári shyǵaryldy. Oqıǵa ornynda quqyq qorǵaý organdary men barlaý qyzmetkerleri júr.
Esterińizge sala keteıik, búgin qylmystyq toptyń basshysyn ustaý boıynsha arnaıy operatsııa júrgizilgen bolatyn.
Atys kezinde Qamshy Kólbaev qarsylyq kórsetip, UQK arnaıy jasaǵynyń kúshimen kózi joıyldy.
Buǵan deıin BAQ-ta Ibraımov pen Qulatov kósheleriniń qıylysy aımaǵynda Blonder Pub mekemesiniń janynda (kóleńkeli qojaıyny Qamshy Kólbaev delinedi) atys dybystary estilip, arnaıy operatsııa júrip jatqany týraly aqparat taraǵan bolatyn.
Oqıǵa ornynda arnaıy jasaq sarbazdary boı kórsetken.