Bishkek JEO-daǵy apatqa joǵary sapaly kómir sebep bolýy múmkin – Sadyr Japarov

QYRǴYZSTAN. KAZINFORM – Qyrǵyzstan prezıdenti Sadyr Japarov «Kabar» aqparat agenttigine bergen suhbatynda apatqa joǵary sapaly kómir sebep bolýy múmkin degen boljam aıtty.

S.Japarovtyń aıtýynsha, ótken jyldary Bishkek jylý elektr ortalyǵy Qara-Keche ken ornynyń kómirin paıdalandy, al byltyrdan bastap Shubarkól kómirin jaǵa bastaǵan.

«Buryn Bishkek JEO-da Qara-Keche ken ornynyń kómiri jaǵylatyn. Bul kómir jetilmegen. Ondaǵy kalorııa mólsheri – 3800 kkal/kg. Ótken jyly Shubarkól kómirin satyp aldyq. Bul jaqsy kómir, jylý shyǵarýy – 5500 kkal/kg. Men sarapshy emespin, biraq jarylys qyzmetkerlerdiń onyń joǵary kalorııaly kómir ekenin eskermeı, ony Qara-Kechın kómirindeı jaǵýynyń fonynda jarylys temperatýrasynyń kóterilýinen boldy dep oılaımyn», - dedi Qyrǵyz Respýblıkasynyń Prezıdenti.

Eske sala ketsek, 2 aqpan kúni tańǵy saǵat 3-te Bishkek jylý elektr ortalyǵynda apat bolyp, qondyrǵylar isten shyqqan bolatyn.

Oqıǵanyń sebepteri anyqtalýda. Qyrǵyzstan Respýblıkasy Tótenshe jaǵdaılar mınıstrliginiń málimetinshe, tehnogendik sıpattaǵy nusqamen qatar yqtımal dıversııany da joqqa shyǵarýǵa bolmaıdy.

Oqıǵa saldarynan bes adam zardap shekti, onyń úsheýi túrli dárejedegi kúıikpen aýrýhanada jatyr.

Qalanyń JEO aýmaǵynda tótenshe jaǵdaı jarııalandy. Apat saldaryn jedel joıý úshin jedel shtab quryldy.

Qyrǵyzstan prezıdenti Sadyr Japarov túnde apat bolǵan Bishkek jylý elektr ortalyǵyndaǵy qalpyna keltirý jumystarynyń barysymen tanysty.

Qyrǵyzstan Prezıdenti baspasóz qyzmetiniń habarlaýynsha, el astanasyndaǵy jylý elektr ortalyǵynyń jumysyn tez arada qalpyna keltirý jóninde shuǵyl tapsyrma berildi. Barlyq tıisti qyzmetter kúsheıtilgen rejımde jumys istep jatyr.