Bishkek turǵyndary jaryqtyń óshýinen keıin sý tapshylyǵyna tap boldy

BІShKEK. KAZINFORM — Qyrǵyzstan astanasynyń keıbir aýdandarynda jappaı elektr qýaty óshirilgen soń sý bolmaı otyr, dep habarlaıdy Kazinform menshikti tilshisi. 

Bir kún buryn Bishkekte jaryqtyń óshýi qalanyń sýmen jabdyqtaý júıesiniń jumysynda irkilis týdyrdy. «Bishkekvodokanal» mýnıtsıpaldyq kásipornynyń málimetinshe, apat barlyq sý qabyldaǵysh pen 300-den astam sorǵy stantsııasyna áser etip, bul qysymnyń teńgerimsizdigine jáne gıdravlıkalyq rejımderdiń buzylýyna ákelip soqty.

Kásiporyn qyzmetkerleri jelidegi qysymdy birtindep teńestirýge, sorǵy stantsııalaryn kezeń-kezeńmen iske qosýǵa, sý qubyrynyń gıdravlıkalyq rejımderin qalypqa keltirýge baǵyttalǵan úzdiksiz qalpyna keltirý jumystaryn júrgizip jatyr.

Qala turǵyndaryn sý berýdegi yqtımal úzilisterge túsinistikpen qaraýǵa shaqyrady. Sýmen turaqty jabdyqtaýdy qalpyna keltirý jumystary jalǵasyp keledi.

Eske sala ketsek, 18 maýsymda Bishkektiń birneshe aýdany jaryqsyz qaldy. Qyrǵyzstan Respýblıkasynyń Energetıka mınıstrligi Qyrǵyzstan astanasy men jaqyn mańdaǵy aýdandarda elektr qýatynyń úzilýine ákelgen tótenshe jaǵdaı faktisin rastady. Keıin elektrmen jabdyqtaý qalpyna keltirildi. Keıbir málimet boıynsha, elektr júıesi nysandarynyń birinde apat bolǵan.