Bishkek áýejaıynda ShYU sammıtine baılanysty reıster shekteledi
ASTANA. KAZINFORM — «Manas» halyqaralyq áýejaıy ShYU sammıti men Dúnıejúzilik kóshpendiler oıyndarynyń ótýine baılanysty 31 tamyz jáne 1 qyrkúıek kúnderi arnaıy jumys rejımine kóshedi, dep habarlaıdy Kazinform agenttigi Kabar-ǵa silteme jasap.
Bul kúnderi kúndizgi ýaqytta turaqty jolaýshylar reısterin qabyldaý jáne jóneltý ýaqytsha shekteledi. Bul ShYU sammıti men Dúnıejúzilik kóshpendiler oıyndarynyń ótýine baılanysty memleket basshylary men resmı delegatsııalardyń áýe kemelerin qabyldaý jáne olarǵa qyzmet kórsetý jumystaryn uıymdastyrýǵa baılanysty.
31 tamyzda shekteýler saǵat 09:00–den 20:00–ge deıin qoldanylady. Osy kezeńde sammıtke qatysýshylardyń kelýine baılanysty jolaýshylar reısterin qabyldaý jáne jóneltý ýaqytsha shekteledi.
1 qyrkúıekte áýejaı arnaıy rejımde jumysyn jalǵastyrady. Jolaýshylar reısterin oryndaýǵa qoıylatyn shekteýler saǵat 10:00–den 22:00–ge deıin kúshinde bolady.
— Qazirgi ýaqytta «Qyrǵyzstan áýejaılary» AAQ áýe kompanııalarymen birlesip qajetti úılestirý jáne aqparattyq jumystardy júrgizip jatyr. Tasymaldaýshylarǵa reıster kestesin aldyn ala túzetý: jekelegen reısterdiń oryndalý ýaqytyn qoljetimdi ýaqyt aralyqtaryna aýystyrý nemese qajet bolǵan jaǵdaıda olardy toqtatý usynyldy, — delingen «Qyrǵyzstan áýejaılary» AAQ habarlamasynda.
Bul rette «Manas» halyqaralyq áýejaıy jumysyn tolyq toqtatpaıdy. Túngi ýaqytta, shekteýler qoldanylmaıtyn kezeńde, áýejaı jolaýshylar reısterine qyzmet kórsetýdi jalǵastyrady.
31 tamyz jáne 1 qyrkúıek kúnderi sapar josparlap otyrǵan jolaýshylardan qoldanystaǵy kesteni muqııat qadaǵalap, reısteriniń mártebesin áýe kompanııasynan aldyn ala naqtylap, ushý jáne qoný ýaqyty ózgerýi múmkin ekeni eskertildi.
Eske salaıyq, buǵan deıin ShYU sammıtine baılanysty Bishkek turǵyndaryna qaladan ýaqytsha ketýge keńes berilgen edi.
