Zeınetaqy jınaǵyn ıpoteka merzimin qysqartý úshin paıdalanýǵa ruqsat berilýi múmkin

ASTANA. KAZINFORM — Ónerkásip jáne qurylys mınıstrligi turǵyn úı jaǵdaılaryn jaqsartý maqsatynda birjolǵy zeınetaqy tólemderin paıdalaný qaǵıdalaryna ózgerister engizý týraly buıryq jobasyn Ashyq NQA portalynda talqylaýǵa shyǵardy. 

Qujat «Qazaqstan Respýblıkasynyń zańnamasyna sáıkes turǵyn úı jaǵdaılaryn jaqsartý úshin birjolǵy zeınetaqy tólemderin paıdalaný qaǵıdalaryn bekitý týraly» QR Indýstrııa jáne ınfraqurylymdyq damý mınıstriniń 2021 jylǵy 21 qańtardaǵy № 24 buıryǵyna túzetýler engizýdi kózdeıdi.

Joba «Turǵyn úı qatynastary týraly» Qazaqstan Respýblıkasy Zańynyń 10-2-babynyń 10-27) tarmaqshasyna sáıkes ázirlengen.

— Ózgeristerdiń negizgi maqsaty qaǵıdalardy jańa Salyq kodeksiniń normalaryna sáıkestendirý jáne azamattardyń bankter aldyndaǵy boryshtyq júktemesin azaıtý. Endi zeınetaqy jınaqtaryn negizgi qaryzdy óteý, aı saıynǵy tólemdi azaıtý nemese ıpotekalyq qaryz merzimin qysqartý úshin paıdalaný múmkindigi naqtylanady, — delingen qujatta.

Sondaı-aq qujat qabyldanǵan jaǵdaıda turǵyn úıdi jaqsartý úshin birjolǵy zeınetaqy tólemderin paıdalanýdyń tıimdi tetikteri bekitiledi.

Atalǵan buıryq 2025 jylǵy 21 qarashaǵa deıin qoǵamdyq talqylaýǵa usynylǵan.

Eske sala keteıik, elimizde memlekettik turǵyn úıge muqtaj azamattardy esepke qoıý jáne baspana berý tártibi jańartyldy.

Zeınetaqy qarajatyna alynǵan úıdi satýǵa bola ma myna siltemeden oqyńyz.