Birjaqty kómekten strategııalyq áriptestikke: Qazaqstan men Saýd Arabııasy qatynastary qalaı ózgerip keledi
ALMATY. KAZINFORM — Almatyda ótip jatqan halyqaralyq ǵylymı konferentsııada Qazaqstan men Saýd Arabııasy arasyndaǵy ekonomıkalyq yntymaqtastyqtyń jańa baǵyttary sóz boldy.
Shyǵystanýshy Anar Mustafaeva «Qazaqstan-Saýd Arabııasy qatynastarynyń transformatsııasy: ekonomıkalyq yntymaqtastyqtyń strategııalyq ólshemi» atty baıandamasynda eki el arasyndaǵy yntymaqtastyq ınvestıtsııamen ǵana shektelmeıtinin atap ótti. Onyń aıtýynsha, qazir jasyl energetıka, sý resýrstary jáne azyq-túlik qaýipsizdigi salalarynda uzaqmerzimdi áriptestikti damytýǵa basymdyq berilip otyr. Bul eki eldiń ekonomıkalyq múddelerin ushtastyryp, Qazaqstannyń ınfraqurylymyn jańǵyrtýǵa jáne aýyl sharýashylyǵynyń áleýetin arttyrýǵa múmkindik beredi.
Saýd Arabııasynyń Qazaqstanǵa ınvestıtsııasy
Anar Mustafaevanyń baıandamasynda Saýd Arabııasynyń Qazaqstanǵa bilim berý, densaýlyq saqtaý jáne ınfraqurylym salalarynda 120 mıllıon dollardan astam qoldaý kórsetkeni aıtyldy.
Islam damý banki Qazaqstandaǵy sý qoımalaryn salý men ırrıgatsııa júıelerin jańǵyrtýǵa 1,15 mlrd dollardan astam qarajat bólgen. Kólik, energetıka jáne ónerkásip jobalaryna da 1,1 mlrd dollarǵa deıin qarjy qarastyrylǵan.
— Bul jobalardyń basty ereksheligi — olardyń qysqa merzimdi kommertsııalyq qaıtarymnan góri Qazaqstannyń uzaqmerzimdi ekonomıkalyq turaqtylyǵyna baǵyttalýy. Sý, kólik jáne energetıka sııaqty salalar ulttyq ınfraqurylymnyń bazalyq elementi sanalady, — dedi sarapshy.
Saýd Arabııasynyń «Vision 2030» ulttyq damý baǵdarlamasy Qazaqstannyń energetıkalyq jáne agrarlyq áleýetimen ushtasady.
Energetıka salasynda saýdııalyq ACWA Power kompanııasy Jetisý oblysyndaǵy Jońǵar qaqpasynda qýaty 1 GVt bolatyn jel elektr stantsııasyn salý jobasyn júzege asyryp jatyr. Jobanyń quny 1,8 mlrd dollar dep baǵalanǵan. Onyń iske asýy Qazaqstanda jańartylatyn energııa kózderin damytýǵa jáne jel energetıkasy salasyna jańa tehnologııalardy engizýge yqpal etýi múmkin.
Eki elge de tıimdi
Saýd Arabııasy Qazaqstannyń agrarlyq jáne óńdeý ónerkásibi salalaryna ınvestıtsııa salýǵa múddeli.
— Usynylǵan model Qazaqstandaǵy ınvestıtsııalyq jobalardy Saýd Arabııasyndaǵy ózara jobalarmen baılanystyrady. Bul tásildiń mańyzy — Qazaqstanǵa kapıtal men tehnologııa, al Saýd Arabııasyna uzaqmerzimdi azyq-túlik jetkizilimi qajet. Sondyqtan bul birjaqty kómek emes, «win-win» (ózara tıimdi) qaǵıdatyna saı keledi, — dedi Mustafaeva.
Osylaısha, Qazaqstan men Saýd Arabııasy arasyndaǵy qatynastar birjaqty qarjylaı qoldaýdan ózara ekonomıkalyq múddelerge negizdelgen strategııalyq áriptestikke qaraı bet alyp keledi.
Eske salaıyq, Almatyda «Qazaqstan men Shyǵys áleminiń tarıhı-mádenı, saıası-ekonomıkalyq qarym-qatynastary: tarıhy, búgini jáne damý betalysy» atty halyqaralyq ǵylymı-praktıkalyq konferentsııasy ótip jatyr.
Shyǵystanýshy Shyǵys arhıvterinen Qazaqstan tarıhyna qatysty myńdaǵan eńbek tabylǵanyn aıtty.
Konferentsııada spıkerlerdiń biri Qazaqstan birneshe kólik dálizin ushtastyrý arqyly tranzıt múmkindigin keńeıtetinin aıtyp berdi.
