«Brıýsseldiń 20 shaqyrymy»: 50 myńnan astam sportsúıer qatysty

ASTANA. KAZINFORM –Eýropa astanasynda jyl saıyn ótetin «Brıýsseldiń 20 shaqyrymy» atty sporttyq shara ótti, dep habarlaıdy Kazinform agenttiginiń menshikti tilshisi. 

20 shaqyrymdyq júgirý – jartylaı marafon emes, biraq Belgııa astanasy úshin mańyzdy oqıǵa. Bıyl Brıýssel kósheleriniń úlken bóligi 45-shi ret júgirýshiler men jaıaý júrginshiler úshin arnaıy jabyldy.

Shara Belgııa Táýelsizdiginiń 50 jyldyǵy saıabaǵynda bastaldy. Marafonǵa qatysýshylar kelesi kezekte Belgııa astanasynyń tarıhı bóligi Eýropalyq kvartaldy kesip ótip, máre syzyǵyna Brıýsseldegi «Bois de Cambre» úlken kórkem saıabaǵy arqyly jetýi kerek boldy.

Uıymdastyrýshylar baǵdar boıymen sporttyq sharaǵa qatysýshylardy sýmen jáne salqyndatqysh sýsyndarmen qamtamasyz etetin oryndar qarastyrdy. Bul rette uıymdastyrýshylarǵa myńnan astam erikti kómektesti.

Uıymdastyrýshylardyń málimetinshe, bıylǵy jyly sharaǵa qatysýǵa 50 myńnan astam adam tirkelgen. Onyń 35 myńnan astamy – júgirý áýesqoılary, 6 myńy – jaıaý júrýdi unatatyndar, 1 myńy – múmkindigi shekteýli jandar.

Sharaǵa qatysýshylardyń baǵyty Belgııa astanasynyń áıgili kórnekti jerleri bar aımaqtar arqyly ótti.

20 shaqyrymdyq marafonyna qatysýshylardyń arasynda Belgııada turyp, sonda jumys isteıtin qazaqstandyqtar da boldy. Otandastar mundaı sporttyq sharalarǵa únemi qatysyp, salaýatty ómir saltyn ustanýǵa tyrysatynyn atap ótti.

Jarys sońynda uıymdastyrýshylar ár qatysýshyǵa sporttyq sharaǵa qatysqany úshin estelik medal tabystady.

Buǵan deıin elordalyq Trıatlon saıabaǵynda kezekti BI Marathon qaıyrymdylyq marafony ótkenin jazǵan bolatynbyz.