Brıýsseldegi sarapshylar Qazaqstannyń jańa saıası dáýirin talqylady

Jıyn «Qazaqstannyń jańa saıası dáýiri: konstıtýtsııalyq reformalar is júzinde» taqyrybyna arnaldy.

Qazaqstannyń Belgııadaǵy Elshiliginde ótken kezdesýge Belgııa Korol saraıynyń, Eýropalyq odaqtyń negizgi ınstıtýttarynyń, Eýropalyq ınvestıtsııalyq bankiniń ókilderi, dıplomatııalyq korpýs músheleri, sarapshylar, bıznes jáne medıa salasynyń ókilderi qatysty.

Qatysýshylar jańa konstıtýtsııalyq modeldi iske asyrýdyń alǵashqy nátıjelerin, saıası ınstıtýttardyń jańarýyn jáne eldiń odan arǵy saıası damý perspektıvalaryn talqylady.

Pikirtalasty Qazaqstannyń Belgııadaǵy jáne Lıýksembýrgtegi Elshisi, Qazaqstannyń Eýropalyq odaq pen NATO janyndaǵy turaqty ókili Roman Vasılenko ashyp, konstıtýtsııalyq ózgeristerdiń negizgi nátıjelerin tanystyrdy.

Ol Qazaqstannyń memlekettik ınstıtýttardy nyǵaıtýǵa, qoǵamdyq dıalogty damytýǵa jáne memlekettik basqarýdyń tıimdiligin arttyrýǵa baǵyttalǵan reformalardy is júzinde júzege asyrýdyń jańa kezeńine qadam basqanyn atap ótti.

Osy oraıda elshi aldaǵy ýaqytta Halyq keńesin qurýdyń mańyzyn atap ótti.

Onyń aıtýynsha, bul organ keń aýqymdy qoǵamdyq dıalog pen qoǵamnyń túrli toptarynyń ulttyq kún tártibin qalyptastyrýǵa qatysýy úshin qosymsha alańǵa aınalady.

Kezdesýde eldiń ekonomıkalyq jáne tehnologııalyq jańǵyrýyna da erekshe nazar aýdaryldy. Atap aıtqanda, tsıfrlandyrý, jasandy ıntellektini damytý, ınfraqurylym men adamı kapıtaldy jetildirý máseleleri qozǵaldy.

Roman Vasılenko reformalardyń halyqaralyq qyryna toqtalyp, Qazaqstannyń egemendik, dıalog, beıbitshilik jáne ózara tıimdi yntymaqtastyq qaǵıdattaryna beıildiligin atap ótti. Sondaı-aq halyqaralyq seriktestermen, sonyń ishinde Eýropalyq odaqpen ózara is-qımyldy odan ári tereńdetý perspektıvalary sóz boldy.

Eýropalyq EUalive basylymynyń bas redaktory Georgı Gotev Qazaqstanǵa jaqynda bolǵan sapary, sonyń ishinde Quryltaıǵa alǵashqy saılaý kezeńindegi sapary týraly pikir bildirdi. Ol bul saılaýdy eldiń saıası damýyndaǵy mańyzdy kezeń dep baǵalady.

Sonymen qatar Georgı Gotev Shanyraq Dialogues alańyn Qazaqstannyń Eýropalyq odaqpen jáne Belgııamen qarqyndy damyp kele jatqan qarym-qatynasyn tolyqtyratyn beıresmı pikirtalas alańy retinde joǵary baǵalady.

Diplomatic World basylymynyń jobalyq dırektory Alberto Tıýrkstra qazirgi kezeńdi Qazaqstannyń saıası jáne ınstıtýtsıonaldyq damýyndaǵy betburysty kezeń dep sıpattady.

Onyń pikirinshe, búginde negizgi másele konstıtýtsııalyq reformanyń mazmunynan góri jańa ınstıtýttardyń is júzinde qalaı jumys isteıtinine jáne olardyń aınalasynda qandaı saıası mádenıet qalyptasatynyna baılanysty.

Sarapshy jańa bir palataly Quryltaıdyń saıası jańǵyrý men sheshim qabyldaý úderisiniń tıimdiligin arttyrýdaǵy róline erekshe toqtaldy.

Onyń baǵalaýynsha, reformalar Qazaqstannyń memlekettik ınstıtýttaryn el damýynyń jańa kezeńine beıimdeýge, eseptilikke, azamattardyń qatysýyna jáne ınstıtýtsıonaldyq tepe-teńdikke basymdyq berýge umtylysty kórsetedi.

Suraq-jaýap sessııasy barysynda qatysýshylar konstıtýtsııalyq ózgeristerdi, iskerlik jáne ınvestıtsııalyq ortany damytýdy, sondaı-aq Eýropalyq odaq pen Belgııamen yntymaqtastyq perspektıvalaryn talqylady.

Jańa konstıtýtsııalyq ınstıtýt – Halyq keńesin qalyptastyrý máselesi de erekshe qyzyǵýshylyq týǵyzdy. Eýropalyq seriktestermen ózara is-qımyl aıasynda saýda-ekonomıkalyq, ınvestıtsııalyq jáne basqa da perspektıvaly salalardaǵy yntymaqtastyqty odan ári keńeıtý múmkindikteri atap ótildi.

Kezdesýde jasandy ıntellekt pen tsıfrlandyrýdy damytýǵa da aıtarlyqtaı kóńil bólindi. Qatysýshylar Qazaqstannyń osy baǵyttaǵy ilgerileýin jáne eýropalyq seriktestermen tájirıbe almasý áleýetin atap ótti.

Talqylaý barysynda «aqyldy qalalardy» damytý, Alataý qalasynyń jobasy jáne Qazaqstannyń halyqaralyq tehnologııalyq bastamalary sóz boldy. Eýropalyq jáne belgııalyq seriktester 1-3 qazanda Astanada ótetin AI & Digital Bridge 2026 forýmyna qatysýǵa shaqyryldy.

Qazaqstandaǵy aýqymdy ózgeristerdi eskere otyryp, el damýynyń uzaq merzimdi perspektıvalaryna da qyzyǵýshylyq tanytyldy. Pikir almasý barysynda Qazaqstannyń Ortalyq Azııa men Eýropa arasyndaǵy kólik-logıstıkalyq baılanystardy nyǵaıtýdaǵy róliniń artyp kele jatqany atap ótildi.

Sonymen qatar Qazaqstannyń halyqaralyq kelispeýshilikterdi beıbit jolmen retteýge, BUU Jarǵysy men halyqaralyq quqyq qaǵıdattaryn ustanýǵa degen ustanymy jáne jas urpaqtyń áleýeti sóz boldy.

Shanyraq Dialogues otyrysy Qazaqstannyń ishki kún tártibi men Eýropamen seriktestigine qatysty kásibı ári mazmundy pikirtalas ótkizý alańy retinde platformanyń mańyzyn kórsetti.

Osyǵan deıin Eýroparlamentte Qazaqstannyń reformalary men EO-men seriktestigi talqylanǵany týraly jazdyq.