Brıýsseldegi qazaq jastary tyń jobalaryn usyndy
ASTANA. KAZINFORM — Respýblıka kúni qarsańynda ári Qazaqstan táýelsizdiginiń 35 jyldyǵyna oraı eldiń Brıýsseldegi elshisi Roman Vasılenko Belgııa men Lıýksembýrg ýnıversıtetterinde bilim alyp júrgen qazaqstandyq stýdenttermen kezdesti, dep habarlaıdy Kazinform agenttiginiń Eýropa odaǵyndaǵy menshikti tilshisi.
Qazaqstannyń Belgııadaǵy elshiliginde Belgııanyń jetekshi joǵary oqý oryndarynda oqıtyn 50-ge jýyq qazaqstandyq stýdentpen kezdesý ótti. Jıynda jastardyń bilim alý múmkindikteri, Qazaqstan men EO arasyndaǵy bilim berý yntymaqtastyǵy jáne ekijaqty baılanystardy nyǵaıtý bastamalary talqylandy.
— Búginde shetelde bilim alýmen qatar, óz ıdeıalaryńyzdy júzege asyrýǵa jol ashatyn tájirıbe jınap, kásibı baılanys ornatý mańyzdy. Qazaqstan men Belgııa arasyndaǵy kelesi tabysty joba sizderdiń birińizdiń bastamańyzdan bastalýy múmkin, — dedi Roman Vasılenko.
Belgııa koroli Fılıpp pen Matılda patshaıymnyń Qazaqstanǵa jasaǵan tarıhı memlekettik sapary eki eldiń bilim berý salasyndaǵy yntymaqtastyǵyna jańa múmkindikter ashty. Forým qorytyndysynda akademııalyq almasý, ǵylymı zertteýler men birlesken bilim berý baǵdarlamalaryn damytý jóninde 22 kelisim men memorandýmǵa qol qoıyldy.
Qazaq Society stýdentter qaýymdastyǵynyń jańadan saılanǵan prezıdenti Nazgúl Nurǵalı uıymnyń qyzmeti men bilim berý, mádenı jáne qoǵamdyq jobalardy júzege asyrý josparlaryn tanystyrdy.
— Qazaq Society jastar bas qosyp, bir-birine qoldaý kórsetip qana qoımaı, jańa ıdeıalar usynyp, birlesken jobalardy júzege asyratyn ári eýropalyqtardy zamanaýı Qazaqstanmen tanystyratyn ortaǵa aınalsa deımiz, — dedi Nazgúl Nurǵalı.
Kezdesýde stýdentter óz ıdeıalaryn bólisip, elshilikpen yntymaqtastyqty damytý múmkindikterin talqylady. Sondaı-aq jastardy biriktirip, ulttyq qundylyqtardy dáripteýge baǵyttalǵan jańa is-sharalar ótkizý jóninde usynystar aıtty.
Atalǵan bastamalardyń biri – Qazaqstan men Eýropa arasyndaǵy qarym-qatynasqa arnalǵan stýdentterdiń esseleri men shyǵarmashylyq jobalarynyń jyl saıynǵy baıqaýyn uıymdastyrý. Oǵan otandyq, belgııalyq jáne ózge sheteldik stýdentter qatysa alady.
Baǵdarlama aıasynda ınteraktıvti vıktorına uıymdastyrylyp, dıplomattarmen beıresmı kezdesý ótti. Qatysýshylar konsýldyq máselelerdi qosa alǵanda, ózderin tolǵandyrǵan suraqtardy talqylady.
Kezdesý Belgııa men Lıýksembýrgtegi stýdentter qaýymdastyǵyn nyǵaıtyp, elshilik qoldaýymen jańa birlesken bastamalardy damytýǵa jol ashty.
Buǵan deıin Belgııa koroli men patshaıymy Qazaqstanǵa kelgenin habarlaǵan bolatynbyz.
