Brıýsseldegi halyqaralyq qaýipsizdik forýmyna Ortalyq Azııadan tek Qazaqstan qatysty

ASTANA. KAZINFORM — Brıýsselde qaýipsizdik jáne qorǵanys máselelerine arnalǵan úshinshi Shýman forýmy (Schuman Security and Defence Forum) ótip jatyr. Eýropalyq syrtqy baılanystar qyzmeti (EEAS) uıymdastyrǵan halyqaralyq jıynǵa Eýropalyq odaqqa múshe elder men 85-ten astam seriktes memlekettiń joǵary laýazymdy ókilderi, halyqaralyq jáne óńirlik uıymdar, jetekshi saraptamalyq ortalyqtar men ǵylymı qaýymdastyq músheleri qatysty. Bul týraly Kazinform agenttiginiń menshikti tilshisi habarlady.

Brıýsseldegi halyqaralyq qaýipsizdik forýmyna Ortalyq Azııadan tek Qazaqstan qatysty
Foto: Arnur Rahymbaev\Kazinform

Qazaqstan forýmǵa Syrtqy ister mınıstri Muhtar Tileýberdi bastaǵan delegatsııa atynan qatysyp jatyr. Qazaqstan — Ortalyq Azııa elderiniń ishinde osy deńgeıdegi halyqaralyq jıynǵa qatysqan jalǵyz memleket.

17–18 qarasha kúnderi Eýroparlament ǵımaratynda ótip jatqan forýmnyń negizgi taqyryby — jahandyq qaýip-qaterler men turaqsyzdyq kúsheıgen kezeńde beıbitshilik, qaýipsizdik jáne qorǵanys salasyndaǵy senimdi áriptestikti damytý.

18 qarashadaǵy negizgi baǵdarlama aıasynda Eýroparlament prezıdenti Roberta Metsolanyń quttyqtaý sózi, Eýropalyq odaqtyń syrtqy ister jáne qaýipsizdik saıasaty jónindegi joǵary ókili Kaıa Kallastyń negizgi baıandamasy josparlanǵan. Onyń atynan sózdi Eýropalyq syrtqy baılanystar qyzmetiniń bas hatshysy Kaısa Ollongren sóıledi. Sonymen qatar plenarlyq otyrystar men dóńgelek ústelder uıymdastyryldy.

Forýmda mynadaı ózekti máseleler talqylanyp jatyr:

  • Jahandyq qaýipsizdiktiń ózgerýi jáne senimdi halyqaralyq áriptestik;
  • Qarýly qaqtyǵystar men terrorızmniń ózara baılanysy;
  • Jańa qaýip-qaterlerge tótep berý;
  • Qorǵanys salasyndaǵy jetkizý tizbekteri;
  • Teńiz qaýipsizdigi, keme qatynasynyń erkindigi jáne kóleńkeli flotqa qarsy kúres;
  • Halyqaralyq tártip, bitimgerlik jáne adam qaýipsizdigi.

Brıýsselde Qazaqstannyń forýmǵa qatysýy elimizdiń Ortalyq Azııadaǵy Eýropalyq odaqtyń mańyzdy seriktesi retindegi rólin, sondaı-aq óńirlik qaýipsizdik pen turaqtylyqty nyǵaıtýǵa múddeliligin kórsetetini atap ótildi.

Qazaqstan Syrtqy ister mınıstrliginiń Erekshe tapsyrmalar jónindegi elshisi Stanıslav Vasılenko Kazinform tilshisine bergen suhbatynda Shýman forýmy Eýropalyq odaq pen onyń seriktesteri arasyndaǵy joǵary deńgeıdegi dıalog alańy ekenin aıtty.

Brıýsseldegi halyqaralyq qaýipsizdik forýmyna Ortalyq Azııadan tek Qazaqstan qatysty
Foto: Arnur Rahymbaev\Kazinform

— Qazaqstannyń Ortalyq Azııadan jalǵyz memleket retinde qatysýy elimizdiń kópvektorly syrtqy saıasatynyń basym baǵyttaryn jáne Eýropalyq odaqpen qaýipsizdik salasyndaǵy áriptestikti nyǵaıtýǵa degen múddeliligin kórsetedi, — dedi Stanıslav Vasılenko.

Forýmda sóz sóılegen qazaqstandyq ókil terrorıstik uıymdardyń úgit-nasıhat júrgizý, jaqtastaryn tartý jáne kıbershabýyl jasaý úshin jasandy ıntellekt pen tsıfrlyq platformalardy barǵan saıyn belsendi paıdalanyp jatqanyn atap ótti.

Onyń aıtýynsha, ásirese jastardyń ınternet arqyly radıkaldy toptardyń yqpalyna túsýi jáne dıpfeık tehnologııalarynyń taralýy alańdaýshylyq týǵyzady.

Sondaı-aq ol terrorıstik toptar men uıymdasqan qylmystyq qurylymdar arasyndaǵy baılanystyń kúsheıip kele jatqanyna nazar aýdardy. Mundaı toptar zańsyz áreketterin qarjylandyrý úshin adam saýdasy, esirtki jáne qarý-jaraq aınalymy sııaqty qylmystyq shemalardy paıdalanady.

Qazaqstannyń osy qaýip-qaterlerge qarsy kúres baǵytyndaǵy bastamalaryna toqtalǵan Stanıslav Vasılenko ótken aptada Astanada BUU aıasynda kıberqylmysqa qarsy kúres jónindegi iri halyqaralyq konferentsııa ótkenin eske saldy.

— Qazaqstannyń kıberqaýipsizdik pen jasandy ıntellektini basqarý jónindegi BUU ortalyǵyn Astanada qurý týraly bastamasyn Birikken Ulttar Uıymynyń qoldaǵany qýantady. Bul — elimizdiń osy baǵyttaǵy jumysy úshin mańyzdy qadam, — dedi ol.

Aıta keteıik, buǵan deıin Qazaqstannyń Syrtqy ister mınıstri Muhtar Tileýberdi Belgııaǵa jumys sapary aıasynda osy eldiń iri kompanııalarynyń basshylarymen jeke kezdesýler ótkizgen bolatyn.