Brıýsseldegi 20 shaqyrymdyq jarysqa 400-den astam medıtsına qyzmetkeri jumyldyryldy
ASTANA. KAZINFORM — Búgin Eýropa astanasy Brıýsselde dástúrli 20 shaqyrymdyq jappaı júgirý jarysy ótedi. Bıyl uıymdastyrýshylar aptap ystyqqa baılanysty qosymsha qaýipsizdik sharalaryn engizdi, dep habarlaıdy Kazinform agenttiginiń Eýroodaqtaǵy menshikti tilshisi.
Batys Eýropada joǵary temperatýra bir aptadan astam ýaqyt boıy saqtalyp tur.
Belgııada kúndiz aýa temperatýrasy 29–30 gradýsqa deıin kóteriledi.
Ylǵaldyń joǵary bolýy jarysqa qatysýshylar úshin qosymsha qıyndyq týǵyzady.
Soǵan qaramastan shamamen 50 myń sportshy Brıýssel kóshelerimen ótetin 20 shaqyrymdyq qashyqtyqty baǵyndyrýǵa daıyn.
Jarys turǵyndar arasynda úlken suranysqa ıe.
Tirkeý birneshe mınýttyń ishinde jabylǵan.
Óıtkeni sharaǵa jartylaı kásibı sportshylar da, áýesqoı júgirýshiler de qatysa alady.
Ótken jyly ótken 45-shi jarysqa 141 elden 48 928 adam qatysqan.
Olardyń qatarynda Qazaqstan ókilderi de boldy.
Aýa raıynyń ystyq bolatynyn eskere otyryp, uıymdastyrýshylar sý men tamaqtaný beketterinen bólek qosymsha medıtsınalyq qoldaý sharalaryn engizdi.
Belgian Red Cross alǵash ret zardap shekken jarysqa qatysýshylarǵa kómek kórsetýge arnalǵan gıpertermııaǵa qarsy arnaıy qurylǵylardy qoldanady.
Jedel kómek qyzmetteri de kúsheıtilgen rejımde jumys isteıdi.
Alǵashqy medıtsınalyq kómek kórsetý úshin 430 erikti medıtsına qyzmetkeri jumyldyryldy.
Olar 14 medıtsınalyq bekette kezekshilik atqarady.
Onyń ishinde Sınkvantener saıabaǵyndaǵy aldyńǵy qatarly medıtsınalyq top ta bar.
STIB kólik kompanııasynyń málimetinshe, jarysqa baılanysty alty tramvaı jáne on alty avtobýs baǵytynyń qozǵalys kestesine ýaqytsha ózgerister engiziledi.
Osyǵan deıin habarlaǵanymyzdaı, Ulybrıtanııada aptap ystyq 103 jyl burynǵy rekordty jańartty.
