Qazaqstan men Eýropalyq Odaq «jasyl» energetıka salasyndaǵy jańa kelisimderge qol qoıdy
ASTANA. KAZINFORM — QR Energetıka mınıstri Erlan Aqkenjenov Brıýsselde ótken «Global Gateway» forýmyna qatysyp, Eýropalyq Odaq ókilderimen birqatar strategııalyq kezdesýler ótkizdi. Bul týraly vedomstvonyń baspasóz qyzmeti jarııalady.
Bul sapar Qazaqstannyń Ortalyq Azııadaǵy EO úshin senimdi ári negizgi seriktes retindegi mártebesin nyǵaıta tústi.
Forým aıasynda mınıstr Eýropalyq komıssııanyń Halyqaralyq seriktestik jónindegi komıssary Iozef Sıkelamen jáne tatý kórshilik pen keńeıtý máselelerine jónindegi komıssary Marta Kospen kelissózder júrgizdi.
Kezdesý barysynda taraptar energetıkalyq qaýipsizdik, «jasyl» ekonomıkaǵa kóshý máselelerin talqylady.
Erlan Aqkenjenov Qazaqstannyń 2060 jylǵa deıin kómirtegi beıtaraptyǵyna qol jetkizýdi strategııalyq maqsat retinde aıqyndap otyrǵanyn atap ótti. Sonymen qatar, eldiń «jasyl» ekonomıkaǵa kóshý úderisinde pragmatıkalyq ári teńgerimdi ustanymdy basshylyqqa alatynyn jetkizdi.
Onyń aıtýynsha, bul protsess jańartylatyn energııa kózderin damytýmen qatar, qazirgi tańda dástúrli generatsııaǵa negizdelgen ulttyq energetıkalyq júıeniń senimdiligin qamtamasyz etýi tıis.
Sapar barysynda ınvestıtsııa tartý máselesine erekshe nazar aýdaryldy. Mınıstr Eýropalyq qaıta qurý jáne damý bankiniń prezıdenti Odıl Reno-Bassomen, Frantsýz damý agenttiginiń dırektory Sırıl Belemen jáne Italııanyń «Cassa Depositi i Prestiti» kompanııalar toby basshylarymen kezdesti.
Sapardyń negizgi nátıjeleriniń biri — Qazaqstan men Eýropanyń jetekshi qarjy uıymdary Eýropalyq qaıta qurý jáne damý banki men Eýropalyq ınvestıtsııalyq bank arasynda yntymaqtastyq týraly memorandýmdarǵa qol qoıylýy boldy. Qujattar jańartylatyn energııa kózderin damytý, elektr jelilerin jańǵyrtý jáne Qambar-Ata GES-1 sekildi óńirlik jobalarǵa ınvestıtsııa tartýǵa baǵyttalǵan.
Sondaı-aq forým aıasynda German halyqaralyq yntymaqtastyq jónindegi qoǵamy uıymdastyrǵan «Ortalyq Azııadaǵy seriktestik dıalogyna» Qazaqstan, Qyrǵyzstan, Ózbekstan, Tájikstan jáne Túrikmenstannyń energetıka mınıstrleri qatysty.
Basqosýda Erlan Aqkenjenov óńirlik elektr saýdasy, gıdroenergetıka jáne jańartylatyn energııa standarttary boıynsha Qazaqstannyń ustanymyn bildirdi.
— Bizdiń Brıýsselge saparymyz Eýropamen energetıkalyq áriptestikti tereńdetýge degen ózara qyzyǵýshylyqtyń joǵary ekenin kórsetti. Qazaqstan — senimdi energııa jetkizýshi el jáne «jasyl» energetıka men sýtegi óndirisinde Eýropa úshin strategııalyq seriktes bolýǵa daıyn. EIB jáne EBRD-pen jasalǵan kelisimder — elimizdiń eýropalyq bızneske turaqty uzaqmerzimdi jobalarǵa arnalǵan ınvestıtsııalyq tartymdylyǵyn aıqyndaıdy, — dedi mınıstr Erlan Aqkenjenov.
Eske sala keteıik, Oljas Bektenov qytaılyq «Hýnan Tszıýnsın Hýanbao» kompanııasynyń dırektorlar keńesiniń tóraǵasy Daı Daogomen «jasyl» energetıka salasyndaǵy yntymaqtastyq perspektıvalaryn talqylaǵan bolatyn.