Brıýsselde Úkimetke qarsy jalpyulttyq narazylyq sherýi ótti
ASTANA. KAZINFORM – 12 mamyr kúni Belgııa astanasy Brıýsselde kezekti aýqymdy ereýil ótti, dep habarlaıdy Kazinform agenttiginiń Brıýsseldegi menshikti tilshisi.
Ártúrli málimet boıynsha, Eýropa astanasynyń kóshelerine úkimettiń áleýmettik-ekonomıkalyq reformalaryna qarsy 40 myńnan 70 myńǵa deıin adam shyqqan.
Ereýildi Belgııanyń úsh iri kásipodaq konfederatsııasy — CSC/ACV, FGTB/ABVV jáne CGSLB/ACLVB uıymdastyrdy. Aktsııaǵa qatysýshylar federaldy úkimet júrgizip otyrǵan reformalarǵa úzildi-kesildi qarsylyq bildirip, olardy «áleýmettik sıpatqa qarsy» dep atady.
Narazylardyń negizgi talaptarynyń qatarynda zeınetaqy júıesindegi ózgeristerden bas tartý, ınflıatsııa deńgeıine saı jalaqyny avtomatty ındeksteý júıesin saqtaý, sondaı-aq energııa baǵasynyń ósýi jaǵdaıynda halyqtyń satyp alý qabiletin qorǵaý sharalaryn qabyldaý bar.
Narazylyq sharalary premer-mınıstr Bart De Vever bastaǵan koalıtsııalyq úkimetke qarsy kásipodaqtardyń shamamen bir jarym jyldan beri jalǵasyp kele jatqan naýqany aıasynda ótip jatyr. Demonstranttar ádil salyq saıasatyn júrgizýdi jáne áleýmettik kepildikterdi qysqartýdan bas tartýdy talap etip keledi.
Ereýil kúni el boıynsha qoǵamdyq kólik qozǵalysy aıtarlyqtaı irkilip qaldy. Poıyzdar, avtobýstar men tramvaılar qysqartylǵan kestemen júrdi. Sharlerýa áýejaıy barlyq reısti tolyq toqtatty. Sondaı-aq Zaventem áýejaıy men eldegi basqa da áýe aılaqtarynyń jumysyna eleýli kedergiler áser etti.
2026 jyldyń naýryz aıynda ótken buǵan deıingi iri kásipodaq aktsııasyna ártúrli esep boıynsha 80 myńnan 100 myńǵa deıin adam qatysqan. Kásipodaqtar eger jumysshylardyń talaptary eskerilmese, narazylyqtardyń odan ári kúsheıýi múmkin ekenin joqqa shyǵarmaıdy.
Belgııa dástúrli túrde áleýmettik qorǵaý deńgeıi joǵary ári kásipodaqtardyń yqpaly kúshti elderdiń biri sanalady. Alaıda qazirgi úkimet reformalary bıýdjet tapshylyǵy men memlekettik qaryzdy qysqartýǵa baǵyttalǵandyqtan, qoǵamda qyzý pikirtalas týǵyzyp otyr.
Aıta keteıik, sáýir aıynda Izraıldiń birneshe qalasynda Netanıahý úkimetiniń ketýin talap etken mıtıng ótti.
