Brıýsselde stýdentter oqý aqysyn kóterýge qarsy narazylyqqa shyqty

ASTANA. KAZINFORM – Brıýssel qalasynyń ortalyǵynda búgin stýdentterdiń narazylyq sherýi ótti. Polıtsııanyń málimetinshe, oǵan shamamen 3 myń adam qatysqan, dep habarlaıdy Kazinform agenttiginiń Eýropalyq odaqtaǵy menshikti tilshisi.

Brıýsselde stýdentter oqý aqysyn kóterýge qarsy narazylyqqa shyqty
Foto: Anadolu

Sherýdiń resmı bóligi eleýli oqıǵalarsyz aıaqtaldy. Alaıda ol aıaqtalǵannan keıin birneshe júz adamnan turatyn top bólinip shyǵyp, tártipsizdik uıymdastyrǵan.

Polıtsııa aımaǵynyń resmı málimetine sáıkes, bólinip shyqqan top Kýnst-Vet qıylysy mańyndaǵy Kishi aınalma joldy jaýyp, graffıtı arqyly ǵımarattar men nysandarǵa zııan keltirgen. Keıin Kreıdttýınlaan kóshesine qaraı bet alǵan. Jol boıynda qala ınfraqurylymyna zaqym keltirip, qoqys jáshikterin, qoǵamdyq velosıpedter men samokattardy paıdalanyp, tosqaýyldar turǵyzǵan.

Shaarbek qaqpasy mańynda qoǵamdyq tártip buzylǵandyqtan, polıtsııa jınalǵandardy taratý úshin sý atqysh qoldanǵan. Vandalızm jasady jáne zattar laqtyrdy degen aıyppen úsh adam, onyń ishinde kámeletke tolmaǵan bir jasóspirim ustaldy.

Shara Halyqaralyq stýdentter kúnine oraı uıymdastyryldy. Oǵan Frantsýz tilinde bilim alatyn stýdentter federatsııasy (FEF) bastamashy bolǵan. Sherýge flamandııalyq stýdenttik uıymdar (VVS), kásipodaq ókilderi jáne basqa da qatysýshylar qosyldy.

Narazylyq bildirýshiler frantsýz tilinde bilim beretin joǵary oqý oryndaryndaǵy oqý aqysynyń 835 eýrodan 1 194 eýroǵa deıin kóterilýine, sondaı-aq qarjylandyrýdyń qysqarýy men oqý jaǵdaıynyń nasharlaýyna qarsylyq bildirdi. Uıymdastyrýshylar sherýge 15 myńǵa deıin adam qatysqanyn málimdedi.

Polıtsııa sherýdiń resmı baǵyty kezinde eleýli quqyq buzýshylyqtar tirkelmegenin atap ótti. Keshke qaraı Kishi aınalma joldaǵy kólik qozǵalysy qalpyna keltirildi.

Eske sala ketsek, buǵan deıin Brıýsselde narazylyq bildirýshiler men polıtsııa arasynda qaqtyǵys bolǵany habarlanǵan.