Brıýsselde soǵysta qaza tapqandardyń eskertkishine gúl qoıyldy
ASTANA. KAZINFORM - Brıýsselde Jeńistiń 81 jyldyǵyna arnalǵan eske alý rásimi ótti. Іs-sharaǵa TMD elderiniń Belgııadaǵy dıplomatııalyq ókildikteri qatysty, dep habarlaıdy Kazinform agenttiginiń Brıýsseldegi menshikti tilshisi.
Dıplomattar Belgııany azat etý jolynda qaza tapqan keńes jaýyngerleri men Qarsylasý qozǵalysyna qatysqan belgııalyqtardyń eskertkishine gúl shoqtaryn qoıdy.
Qazaqstan atynan rásimge elimizdiń Belgııa men Lıýksembýrgtegi Tótenshe jáne Ókiletti Elshisi, Qazaqstannyń Eýroodaq pen NATO janyndaǵy mıssııasynyń basshysy Roman Vasılenko qatysty. Sonymen birge Benılıýks elderindegi áskerı attashe jáne Qazaqstan Qorǵanys mınıstrliginiń NATO janyndaǵy áskerı ókili de gúl shoqtaryn qoıdy.
Brıýsseldegi Ever kommýnalyq zıratynda Ekinshi dúnıejúzilik soǵys kezinde qaza tapqandardyń jappaı jerlengen orny bar. Munda keńes azamattarynyń da qabirleri ornalasqan.
Qorshalǵan aýmaqta marqumdardyń aty-jóni, týǵan jáne qaıtys bolǵan jyldary jazylǵan shaǵyn qulpytastar qoıylǵan.
1999 jyly osy jerde Belgııada qaza tapqan keńes azamattaryna arnalǵan eskertkish ornatylǵan. Eskertkishte orys, frantsýz jáne nıderland tilderinde «Belgııany azat etý jolynda qaza tapqan keńes azamattaryna» degen jazý qashalǵan.
Jyl saıyn Jeńis kúnine oraı bul jerde gúl qoıý rásimi ótedi. Oǵan TMD elderiniń dıplomattary, ofıtserleri jáne sheteldik ókildikterdiń qyzmetkerleri qatysady.
Osyǵan deıin áskerı dıplomattardyń Qytaıda qaza tapqan qazaqstandyq jaýyngerlerdiń rýhyna taǵzym etkeni týraly jazdyq.
