Brıýsselde NATO elderi Bas shtab bastyqtarynyń alǵashqy otyrysy ótti
ASTANA. KAZINFORM – NATO-ǵa múshe elderdiń Bas shtab bastyqtary bıyl alǵash ret Alıanstyń Brıýsseldegi shtab-páterinde bas qosyp, qorǵanys áleýeti men tejeý tetikteriniń qazirgi jaı-kúıin talqylady, dep jazdy Anadoly agenttigi.
Jıyndy asha otyryp, NATO Áskerı komıtetiniń tóraǵasy, admıral Djýzeppe Kavo Dragone 2026 jyldyń basyndaǵy qaýipsizdik ahýalynyń asa kúrdeli bolyp otyrǵanyn atap ótti.
— Reseıdiń Ýkraınaǵa qarsy soǵysy jalǵasyp jatyr. Ortalyq jáne ońtústik kórshiles óńirlerde turaqsyzdyq pen zorlyq-zombylyq saqtalyp otyr. Bul shıelenister saýda joldaryna, energetıkalyq aǵyndarǵa jáne Eýropa men Soltústik Amerıkadan tys aımaqtardaǵy qaýipsizdikke de áser etip otyr. Ózge de dostyq peıildegi emes kúshter jahandyq turaqtylyqqa qaýip tóndirýin jalǵastyrady. Biz kún saıyn kıbershabýyldarmen, dıversııalarmen jáne jalǵan aqparat taratý áreketterimen betpe-bet kelip otyrmyz, — dedi Dragone.
Admıral jańa tehnologııalardyń gıbrıdti qaterlerdiń taralýyn jedeldetip, olardy anyqtaýdy qıyndatýy múmkin ekenin eskertti. Onyń aıtýynsha, eki kúnge sozylatyn otyrys aıasynda odaqtas elderdiń Bas shtab bastyqtary tejeý men qorǵanys salasyndaǵy daıyndyq deńgeıine baǵa beredi. Sonymen qatar, NATO–Ýkraına keńesiniń otyrysy ótip, Eýroodaq pen Azııa elderindegi seriktestermen kezdesýler josparlanǵan.
Óz qyzmetindegi alǵashqy jylyn qorytyndylaı kele, Dragone osy ýaqyt ishinde bul toptyń basty ereksheligi — birlik ekenine kóz jetkizgenin aıtty. Onyń sózinshe, demokratııalyq alıans ishindegi pikir aıyrmashylyqtary — qalypty qubylys jáne dál osy faktorlar NATO-ny odan ári kúsheıte alady.
Jıynnyń ashylýynda Davosta ótken Dúnıejúzilik ekonomıkalyq forýmǵa qatysýyna baılanysty jeke ózi kele almaǵan NATO Bas hatshysy Mark Rıýtteniń beıneúndeýi kórsetildi.
— Qaýipsizdik salasyndaǵy jaǵdaı men strategııalyq ahýal bizden turaqty túrde daıyn bolýdy talap etedi. Pýtınniń áskerı mashınasy táýlik boıy jumys istep, qarý-jaraq óndirip otyr, al Máskeý áýe keńistigin buzý, kıbershabýyldar, dıversııalar jáne ózge de áreketter arqyly bizdi synap otyr, — dedi Rıýtte.
Ol Qytaı, Iran jáne Soltústik Koreıanyń Reseıdi qoldap otyrǵanyn atap ótti.
— Bul elder bizben uzaq merzimdi qarsy turýǵa daıyndalyp otyr. Sonymen qatar, terrorızm qaýpi saqtalyp otyr, al NATO-nyń ońtústiktegi kórshiles aımaqtaryndaǵy turaqsyzdyq keń aýqymda jalǵaspaq. Biz betpe-bet kelip otyrǵan qaýipter aıqyn, naqty ári uzaq merzimdi. Sondyqtan árdaıym daıyndyqta bolýymyz qajet, — dedi NATO Bas hatshysy.
Rıýtte aldaǵy Ankara sammıti qarsańynda qorǵanys salasyna salynatyn ınvestıtsııalardy arttyrýdyń mańyzyn da atap ótip, AQSh-tan bólek odaqtastardyń da dástúrli tejeý men qorǵanys salasynda úlken jaýapkershilik alýy tıis ekenin aıtty.
Eske sala keteıik, AQSh Kongresi «NATO birligin qorǵaý» týraly zań jobasyn daıyndady.