Brıýsselde narazylyq bildirýshiler men polıtsııa arasynda qaqtyǵys boldy
ASTANA. KAZINFORM — Búgin Eýropa astanasynda jergilikti kásipodaqtar uıymdastyrǵan iri narazylyq aktsııasy ótti. Eńbekshiler sherýi Ońtústik vokzal mańynda jastar men polıtsııa arasyndaǵy qaqtyǵysqa ulasty. Quqyq qorǵaý organdary birneshe adamnyń ustalǵanyn habarlady. Bul týraly Kazinform agenttiginiń menshikti tilshisi habarlady.
Tańerteń Brıýsseldegi Ortalyq vokzal mańyna beıbit narazylyq aktsııasyna qatysýshylar jınaldy. Aktsııany eldegi eń iri kásipodaqtar uıymdastyrdy. Olardyń bastamasymen shamamen 30 myń adam jınalǵan.
Brıýssel polıtsııasynyń málimetinshe, sherý jalpy beıbit ótken. Alaıda sherýdiń shetki bólikterinde, ásirese Ortalyq jáne Mıdı vokzaldary mańynda birneshe qaqtyǵys pen oqıǵa tirkelgen.
— Qyzmetkerlerimizge birneshe ret túrli zattar, sonyń ishinde shyny bótelkeler, tas kesekteri, kirpishter, taıaqtar men pırotehnıkalyq buıymdar laqtyryldy, — delingen polıtsııa habarlamasynda.
Sonymen qatar yqtımal qaýipti zattar, onyń ishinde qoldan jasalǵan janǵysh qospalar, benzın, pırotehnıkalyq buıymdar, pyshaq, balǵa, ottyqtar men qolǵaptar tabylǵan.
Qazirgi ýaqytta úsh adam ákimshilik tártippen, al 18 adam sot sheshimimen qamaýǵa alynǵan. Sot sheshimimen ustalǵandardyń 13-i — kámeletke tolmaǵandar, beseýi — eresekter. Bul málimetter ózgerýi múmkin.
— Qala ortalyǵynda tynyshtyqty tolyq qalpyna keltirý jáne jańa oqıǵalardyń aldyn alý úshin qyzmetkerlerimiz jumysyn jalǵastyryp jatyr, — dep atap ótti polıtsııa.
