Brıýsselde QR azamattary úshin EO vızalyq rejımin jeńildetý týraly kelissóz ótedi
BRıÝSSELЬ. KAZINFORM – Qazaqstan Syrtqy ister mınıstri Ermek Kósherbaev pen Eýropalyq odaqtyń Syrtqy ister jáne qaýipsizdik saıasaty jónindegi joǵary ókili Kaıa Kallastyń tóraǵalyǵymen «Qazaqstan – Eýropalyq odaq» yntymaqtastyq keńesiniń 22-shi otyrysy ótti. Bul týraly QR SІM habarlady.
Іs-sharanyń mańyzdylyǵy Qazaqstan men Eýropalyq odaq jáne onyń múshe memleketteri arasyndaǵy Keńeıtilgen seriktestik pen yntymaqtastyq týraly kelisimge qol qoıylýynyń 10 jyldyǵyna oraı ótkizilýimen erekshe aıshyqtaldy.
Taraptar Astana men Brıýssel arasyndaǵy strategııalyq seriktestiktiń on jyldyq nátıjesin qorytyndylap, onyń bolashaqtaǵy damýy jónindegi kózqarasymen bólisti.
Ekonomıkalyq baılanystar yntymaqtastyqtyń negizgi qozǵaýshy kúshi bolyp qala beretini rastaldy. Eýropalyq odaq Qazaqstannyń eń iri saýda jáne ınvestıtsııalyq seriktesi mártebesin saqtap otyr. 2024 jyly ózara taýar aınalymy 50 mlrd AQSh dollaryna jaqyndady, al eýropalyq ınvestıtsııalardyń jalpy aǵyny 200 mlrd AQSh dollaryna jetti.
Elde eýropalyq qatysýy bar 4 myńnan astam kompanııa jumys isteıdi. Qazaq tarapy saýdany odan ári ártaraptandyrýǵa daıyn ekenin bildirip, otandyq aýyl sharýashylyǵy ónimderiniń EO naryǵyna qol jetkizýin keńeıtýdiń mańyzyn atap ótti.
Erekshe nazar Transkaspıı halyqaralyq kólik baǵdaryn («Orta dáliz») damytý máselesine aýdaryldy. Ǵalamdyq jetkizý tizbekteriniń transformatsııasyn eskere otyryp, taraptar bul baǵyttyń Eýropa men Azııa arasyndaǵy senimdi ári turaqty kólik dálizi retindegi strategııalyq mańyzyn rastady. Qazaqstan bul korıdordy odan ári damytý úshin EO jáne óńirlik seriktestermen yntymaqtastyqty tereńdetýge daıyn ekenin jetkizdi.
Jeke baǵyt retinde «jasyl» jáne tsıfrlyq transformatsııa salasyndaǵy ózara is-qımyl talqylandy. Taraptar bul baǵyttyń Qazaqstan ekonomıkasynyń jańǵyrtylýyna jáne Eýropanyń ónerkásiptik turaqtylyǵyna birdeı úles qosatyn perspektıvaly sala ekenin atap ótti.
Otyrysqa qatysýshylar parlamenttik yntymaqtastyqtyń mańyzyn da atap ótip, qarasha aıynda Brıýsselde ótken «QR – EO» parlamenttik yntymaqtastyq komıtetiniń 22-shi otyrysynyń tabysty ótkenin joǵary baǵalady.
Adamdar arasyndaǵy baılanysty keńeıtýge erekshe nazar aýdaryldy. Taraptar 2 jeltoqsanda Brıýsselde QR azamattary úshin EO vızalyq rejımin jeńildetý jáne readmıssııa týraly kelissózderdi bastaýdy quptady.
Bul qadam gýmanıtarlyq baılanystardy nyǵaıtýǵa, stýdentter, ǵalymdar men kásibı mamandar úshin múmkindikterdi keńeıtýge, sondaı-aq azamattardyń mobıldigin arttyrýǵa eleýli úles qosady.
Óńiraralyq yntymaqtastyq turǵysynan 2025 jylǵy sáýirde Samarqandta ótken «Ortalyq Azııa – EO» alǵashqy sammıtinde qabyldanǵan tarıhı sheshim erekshe atalyp ótti. Onyń nátıjesinde bul format resmı túrde strategııalyq seriktestik deńgeıine kóterildi.
Otyrys barysynda delegatsııa basshylary Qazaqstan men Eýropalyq odaqtyń kemeldengen, ornyqty jáne bolashaqqa baǵyttalǵan seriktestik qura alǵanyn atap ótti. 29 negizgi ózara is-qımyl baǵytyn qamtıtyn Keńeıtilgen seriktestik pen yntymaqtastyq týraly kelisim osy jyldar ishinde óz tıimdiligi men ózektiligin kórsetip, yntymaqtastyq pen ózara senimdi nyǵaıtýdyń berik negizine aınaldy.
Kezdesý sońynda E.Kósherbaev pen K.Kallas saıası dıalogty odan ári nyǵaıtýǵa, saýda men ınvestıtsııalardy damytýǵa, óńirlik ózara baılanysty arttyrýǵa jáne gýmanıtarlyq saladaǵy yntymaqtastyqty tereńdetýge beıildi ekenin rastady.
Buǵan deıin Eýropalyq odaqpen vızany jeńildetý jumysy kún saıyn júrip jatqanyn jazǵan edik. Ol úshin EO-nyń ár memleketimen jeke sóılesý kerek. Bul jaıly QR Syrtqy ister mınıstrliginiń resmı ókili Aıbek Smadııarov málim etti.