Brıýsselde kópqabatty úıden órt shyǵyp, 130 adam evakýatsııalandy

ASTANA. KAZINFORM – Sársenbi kúni túngi saǵat 00:10-da Belgııa astanasynyń órt sóndirý qyzmetine Chaussée d'Anvers kóshesindegi úıden órt shyqqany týraly habar kelip tústi.

Jergilikti baspasózdiń habarlaýynsha, órt 10 qabatty úıdiń 3-shi qabatyndaǵy páterden shyqqan. Kýágerlerdiń aıtýynsha, jalyn birden 4-shi jáne 5-shi qabattardy sharpydy.

Tótenshe jaǵdaılar qyzmeti polıtseılerdiń kómegimen úıdiń 130-ǵa jýyq turǵynyn evakýatsııalady. Qalǵan turǵyndarǵa óz páterlerinde qalýyn surady.

Qutqarýshylarǵa órtti aýyzdyqtaýǵa bir saǵattaı ýaqyt ketti. Azamattyq qorǵanystyń sońǵy kóligi oqıǵa ornynan tańǵy saǵat 4:00 shamasynda ketti.

Qutqarý jumystary kezinde bir polıtseı zardap shekti, toǵyz adam jeńil ýlaný belgilerimen aýrýhanalarǵa evakýatsııalandy, olardyń arasynda balalar da bar.

Polıtsııa, sonymen qatar, qaýipsizdik perımetrin ornatyp, olardyń sport zalynda evakýatsııalanǵan turǵyndardy qabyldaý ortalyǵyn uıymdastyrdy.