Brıýsselde Qazaqstannyń kópvektorly syrtqy saıasaty týraly kitaptyń tusaýkeseri ótti

ASTANA. KAZINFORM – Seısenbi kúni Brıýssel baspasóz klýbynda frantsýz professory Olıve Arıfonnyń «Baıandaý arqyly dıplomatııa – Azııadaǵy jańa jumsaq kúsh» kitabynyń tusaýkeseri ótti.

Frantsııadaǵy Lıll katolıktik ýnıversıtetiniń saıası kommýnıkatsııa professory Olıve Arıfon Brıýsselde keńesshi bolyp ta jumys isteıdi. Ol zertteýshi retinde Eýropa men Azııada 20 jyl eńbek etti. Buǵan deıin «Qytaı saıasatyna sholý: jumsaq kúsh, kommýnıkatsııa, yqpal» kitabyn jarııalaǵan (Le récit politique china’s: Soft power, communication, influence. L’Harmattan, 2021).

«Baıandaý arqyly dıplomatııa – Azııadaǵy jańa jumsaq kúsh» kitabynyń basym bóligi Qazaqstan memleketiniń qalyptasý tarıhy men kópvektorly saıasatyna arnalǵan. Sonymen qatar onda eldiń «orta derjava» retinde qalyptasyp kele jatqany jazylady.

Sharaǵa dıplomatııalyq korpýstyń, EO sarapshylar qaýymdastyǵynyń ókilderi jáne Qazaqstannyń Belgııadaǵy Elshisi Marǵulan Baımuhan qatysty.

Qazaqstandyq dıplomat frantsýz ǵalymynyń bul eńbegi qazaqstandyq-eýropalyq qarym-qatynastardy zertteýge, damytýǵa jáne nyǵaıtýǵa múddeli sarapshylar men dıplomattar úshin erekshe qyzyqty bolatynyn atap ótti.

Osyǵan deıin «Ulttyq qundylyqtardy damytýǵa baǵyttalǵan naqty sharalar qajet», degen taqyrypta sarapshymen bolǵan suhbatty jarııalaǵan edik.