Brıýsselde Qazaqstan men EO arasyndaǵy ekonomıkalyq seriktestiktiń bolashaǵy talqylandy
ASTANA. KAZINFORM — Brıýsselge sapar aıasynda QR Syrtqy ister mınıstri Ermek Kósherbaev Eýropalyq komıssııanyń Halyqaralyq seriktestik jónindegi komıssary Iozef Sıkelamen kezdesý ótkizdi, dep habarlaıdy Syrtqy ister mınıstrliginiń baspasóz qyzmeti.
Taraptar Qazaqstan men Eýropalyq odaq arasyndaǵy ekonomıkalyq seriktestiktiń qazirgi jaǵdaıy men damý perspektıvalaryn, sondaı-aq EO men Ortalyq Azııa arasyndaǵy óńirlik ózara is-qımyldy talqylady.
Bıyl sáýir aıynda Samarqandta jáne qarasha aıynda Tashkentte ótken joǵary deńgeıdegi is-sharalardyń qorytyndylaryna erekshe nazar aýdaryldy. I.Sıkela atalǵan kezdesýler barysynda qol jetkizilgen negizgi kelisimder, onyń ishinde logıstıka, tsıfrlyq ınfraqurylym jáne Transkaspıı halyqaralyq kólik baǵdary («Orta dáliz») boıyndaǵy porttyq qýattar men avtojoldardy jańǵyrtý jónindegi jańa óńirlik jobalardyń iske qosylýy týraly habardar etti.
Forýmdarda usynylǵan bastamalar mýltımodaldy logıstıkany damytýǵa, kólik aǵyndaryn jedeldetýge jáne osy baǵyt boıyndaǵy rásimderdi tsıfrlandyrýǵa yqpal etetini atalyp ótti. Atap aıtqanda, Aqtaý portyn jańǵyrtýǵa 45 mln eýro, Qazaqstandaǵy avtojoldardy rekonstrýktsııalaýǵa 150 mln eýro kóleminde ınvestıtsııa salý kózdelgen. Suhbattas Eýropalyq odaq Qazaqstandy óńirdiń ornyqty kólik arhıtektýrasyn qamtamasyz etýdegi negizgi seriktes retinde qarastyratynyn jetkizdi.
E.Kósherbaev Ózbekstanda ótken ekonomıkalyq jáne ınvestıtsııalyq forýmdardyń nátıjelerin quptap, Qazaqstan qol jetkizilgen kelisimderdi júzege asyrýǵa belsendi qatysýǵa nıetti ekenin aıtty.
— Qazaqstan Eýropalyq odaqpen asa mańyzdy shıkizattyq materıaldar, kólik pen logıstıka, tsıfrlyq ınnovatsııalar, aýyl sharýashylyǵy, bilim jáne sý resýrstaryn basqarý salalaryndaǵy yntymaqtastyqty odan ári keńeıtýge erekshe mán beredi. Osy rette 2 jeltoqsanda Brıýsselde QR azamattary úshin EO vızalyq rejımin jeńildetý jáne readmıssııa týraly kelissózderdiń bastalýyn quptaımyz, — dep málimdedi mınıstr.
Sonymen qatar jobalardyń oryndalýyn baqylaý jáne yntymaqtastyqtyń jańa baǵyttaryn anyqtaý úshin turaqty dıalogty qoldap otyrý jóninde ýaǵdalastyqqa qol jetkizildi.
Kezdesý qorytyndysy boıynsha Qazaqstan SІM basshysy men Eýrokomıssar saıası dıalogty, ekonomıkalyq seriktestikti jáne Ortalyq Azııa men Eýropanyń turaqtylyǵy men órkendeýine yqpal etetin bastamalardy ózara qoldaýdy odan ári nyǵaıtýǵa beıildiligin rastady.
Budan buryn 1 jeltoqsanda Syrtqy ister mınıstri Ermek Kósherbaev Qazaqstan — EO yntymaqtastyq keńesiniń HHІІ otyrysyna qatysý úshin Brıýsselge saparmen baratyny habarlandy.