Brıýsselde Qazaqstan men Belgııanyń 34 jyldyq dostyǵyna arnalǵan velosherý ótti
ASTANA. KAZINFORM — Qazaqstan Respýblıkasynyń Sport kúnine oraı Qazaqstannyń Belgııadaǵy Elshiligi Brıýsselde Qazaqstan men Belgııa arasyndaǵy dıplomatııalyq qatynastardyń ornaǵanyna 34 jyl tolýyna arnalǵan velosherý uıymdastyrdy, dep habarlaıdy Kazinform agenttiginiń EO-daǵy menshikti tilshisi.
Velosherý Belgııanyń eń tanymal nysandarynyń biri bolyp esepteletin Atomıýmnan bastaldy. Oǵan Qazaqstannyń dıplomattary, Belgııada turatyn otandastar men stýdentter, sondaı-aq belgııalyq seriktester men Qazaqstannyń dostary qatysty.
Іs-sharaǵa qurmetti qonaq retinde Qazaqstannyń belgili veloshabandozy, Astana»velokomandasynyń burynǵy múshesi ári Olımpıada oıyndarynyń qatysýshysy Andreı Kashechkın qatysty.
Іs-sharanyń ashylýynda Qazaqstannyń Belgııadaǵy elshisi Roman Vasılenko eki eldiń 34 jyl ishinde ózara qurmet pen senimge negizdelgen berik seriktestik qalyptastyrǵanyn atap ótti.
Elshiniń aıtýynsha, velosport Qazaqstan men Belgııa arasyndaǵy ekijaqty qarym-qatynastyń sıpatyn beıneleıtin sımvolǵa aınaldy. Óıtkeni alǵa jyljý úshin tepe-teńdik, kúsh-jiger jáne ózara qoldaý qajet.
Velosherý dostyq ári erkin atmosferada ótip, qatysýshylarǵa Sport kúnin atap qana qoımaı, eki el arasyndaǵy dıplomatııalyq qatynastardyń 34 jyldyǵyn birge atap ótýge múmkindik berdi.
Aıta keteıik, Qazaqstan men Belgııa arasyndaǵy qarym-qatynasta jańa mańyzdy kezeń osy kúzde kútiledi. Roman Vasılenkonyń málimetinshe, Belgııa koroli Fılıpp Qazaqstanǵa memlekettik saparmen kelýdi josparlap otyr.
Eske salaıyq, buǵan deıin Belgııa Koroli Fılıpp Qasym-Jomart Toqaevqa jaýap hat joldaǵanyn habarlaǵanbyz.
