Brıýsselde «Qambar-Ata GES-1» jobasyn júzege asyrýdyń kelesi qadamdary talqylandy
ASTANA. KAZINFORM – Brıýsselde Ortalyq Azııanyń energetıkalyq qaýipsizdigin nyǵaıtý jáne sý resýrstaryn ózara tıimdi paıdalaný maqsatyndaǵy mańyzdy aımaqtyq bastama – Qambar-Ata GES-1 jobasyn daıyndaý máseleleri jóninde mınıstrlerdiń úshinshi dóńgelek ústeli ótti.
Kezdesýge QR Energetıka mınıstri Erlan Aqkenjenov, Qyrǵyzstannyń Energetıka mınıstri Taalaıbek Ibraev jáne Ózbekstannyń Energetıka mınıstri Jýrabek Mırzamahmýdov, sondaı-aq úsh eldiń qarjy jáne sý resýrstary salalaryndaǵy ýákiletti organdarynyń ókilderi qatysty. Taraptar Qyrǵyzstandaǵy Naryn ózeninde salynatyn, qýaty 1860 MVt bolatyn Qambar-Ata GES-1 jobasyn iske asyrý boıynsha jospardy talqylady. Jobany úsh el Úkimetteri birlesip júzege asyryp jatyr.
2025 jyldyń qańtar aıynda Tashkentte, mamyr aıynda Dýbaıda ótken kezdesýlerdiń oń nátıjeleri negizinde Brıýsselde bas qosqan mınıstrler Qambar-Ata GES-1 jobasy boıynsha qol jetkizilgen progresterge toqtaldy. Bastapqy qujattama boıynsha tehnıkalyq-ekonomıkalyq negizdeme jobasyn, qorshaǵan orta men áleýmettik ortaǵa áserin baǵamdady.
Sonymen qatar qazan–qarasha aılarynda jergilikti, ulttyq jáne transshekaralyq deńgeıde múddeli taraptarmen keńester ótkizý jospary sóz boldy. Jıynda jobany úsh eldiń birlesip iske asyrý tetikteri, qarjylyq qajettilikter jáne halyqaralyq qarjy ınstıtýttary men damý seriktesterinen qosymsha qarjy tartý múmkindikteri de qarastyryldy.
Úshjaqty kezdesýde taraptar jobany daıyndaý jáne júzege asyrý boıynsha birlesken is-qımyldar men naqty merzimder jóninde kelisimge keldi.
Dóńgelek ústel sheńberinde Qazaqstan delegatsııasy jobanyń donorlar komıtetine múshe birqatar halyqaralyq qarjy uıymdarymen ekijaqty kezdesýler ótkizdi. Onda Qambar-Ata GES-1 jobasyn qarjylandyrý sharttary men múmkindikteri talqylandy. Naqty aıtqanda, delegatsııa Eýropalyq keńes, Dúnıejúzilik bank, Eýropa qaıta qurý jáne damý banki, Azııa ınfraqurylymdyq ınvestıtsııalar banki, Azııa damý banki, OPEC qory jáne basqa da uıym ókilderimen kelissózder júrgizdi.
Aıta keteıik, dóńgelek ústel Qambar-Ata GES-1 jobasyn ázirleý boıynsha tehnıkalyq qoldaý kórsetip otyrǵan Dúnıejúzilik banktiń uıymdastyrýymen ótti.
Eske salsaq, buǵan deıin «Qambar ata» GES-i Ortalyq Azııanyń energetıkalyq áleýetin nyǵaıta túsetinin jazǵanbyz.