Brıýsselde fermerler narazylyǵynan keıin 50 tonnadan astam qoqys shyǵaryldy

ASTANA. KAZINFORM — Brıýsseldegi aımaqtyq qoqys tazalaý agenttigi Net Brussel beısenbi kúni ótken fermerlerdiń narazylyq aktsııalarynan keıin qala kóshelerinen 50 tonnadan astam qaldyq shyǵarylǵanyn málimdedi. Bul týraly Kazinform agenttiginiń menshikti tilshisi habarlady.

Net Brussel qyzmetkerleri barlyq qalǵan qoqysty tazalaý úshin 18 jeltoqsan kúni keshki saǵat 23:00-ge deıin jumys istegen.

Tártipsizdikterdiń aýqymyn eskere otyryp, Belgııa astanasynyń bıligi qalany tazalaý úshin arnaıy shara qabyldady. Kóshelerdi qoqystan tazalaý jumystary beısenbi kúni tústen keıin bastalyp, narazylyq bildirýshiler birtindep tarqatylǵan saıyn jalǵasyn tapty.

Kommýnaldyq qyzmetterdiń negizgi nazary Eýroparlament aldyndaǵy Lıýksembýrg alańyna jınalǵan traktorlardyń júrip ótken baǵyttaryna aýdaryldy. Ásirese Brıýsseldiń ishki aınalma jolyna, Iksel kommýnasyndaǵy Kronlaan kóshesine jáne Sınt-Lambrehts-Volıýve aýdanyndaǵy Paýl Gımanslaan kóshesine erekshe kóńil bólindi.

Tazalaý brıgadalary joldardy órtengen qoqys jáshikteri men shınalardan, sondaı-aq kóp mólsherdegi kartop, qyzylsha jáne dymqyl sabannan tazalady.

Polıtsııa aldyn alý maqsatynda 6 narazylyq qatysýshysyn ustady, al taǵy 7 adam qylmystyq áreketterge kúdikti retinde qamaýǵa alyndy. Narazylyq kezinde tórt polıtseı jaraqat aldy.

— Materıaldyq shyǵyn óte úlken, — dep málimdedi Iksel kommýnasynyń jergilikti polıtsııa ókili.

Onyń aıtýynsha, shamamen on shaqty protıvogaz ben bir dýlyǵa joıylǵan, al ondaǵan forma, qalqan jáne dýlyǵa búlinip, lastanǵan. Sondaı-aq polıtsııa kóligi traktormen soqtyǵysqannan keıin zaqymdanǵan.

Budan bólek, jol belgileri synǵan nemese alynyp tastalǵan, terezeler synǵan, al jol jamylǵysy órt saldarynan búlingen.

Fermerlerdiń narazylyǵy Brıýsselde ótken EO-nyń eki kúndik sammıtiniń alǵashqy kúnimen tuspa-tus keldi.

Agrarlyq sala ókilderi Eýropalyq odaqtyń aýyl sharýashylyǵy saıasatyna, ásirese Ońtústik Amerıkanyń Merkosýr saýda blogymen erkin saýda týraly usynylyp otyrǵan kelisimge qarsy narazylyq bildirdi. Eýropalyq fermerler bul kelisimge qol qoıylǵan jaǵdaıda ádiletsiz básekege tap bolamyz dep qaýiptenedi.

Eýropalyq komıssııa tóraǵasy Ýrsýla fon der Lıaıen osy demalys kúnderi Brazılııaǵa baryp, Merkosýrmen kelisimge qol qoıýy tıis bolǵan. Erkin saýda kelisimin daıyndaý 25 jylǵa sozylǵan.

Alaıda Frantsııa men Italııanyń ótinishinen keıin EO kóshbasshylary kelisimge qol qoıýdy kelesi aıǵa qaldyrýǵa kelisti. Sammıtten keıin Frantsııa prezıdenti Emmanýel Makron eliniń bul kelisimdi 2026 jyldyń qańtarynda maquldaı ala ma, joq pa, ony aıtý ázirge erte ekenin málimdedi.

Aıta ketelik Brıýsselde Eýroodaq kóshbasshylarynyń sammıti bastalǵany týraly jazǵan edik.