Brıýsselde Eýropalyq Odaqtyń shuǵyl sammıti jumysyn bastaıdy

ASTANA.KAZINFORM - Búgin Eýropa astanasyndaǵy kezekten tys kezdesýge Eýropalyq Odaqqa múshe elderdiń 27 kóshbasshysy jınaldy. Sammıt AQSh prezıdenti Donald Tramptyń Reseı prezıdenti Vladımır Pýtınmen kelissózderdi bastaý týraly sheshimine jaýap retinde shaqyryldy. 

Eýropa astanasyndaǵy jaǵdaıdyń qalaı órbıtindigi Kazinform tilshisiniń baqylaýynda.

- Bul maǵynasyz soǵysty toqtatatyn kez keldi. Eger soǵysty toqtatqyńyz kelse, eki tarappen de sóılesýińiz kerek, - dedi D.Tramp osy aptada Kongreske.

Aq úı Kıevke áskerı kómek kórsetýdi ýaqytsha toqtatty jáne bul sheshimniń el úshin qıyn sátte saldary aýyr bolýy múmkin.

- Bizdiń odaqtasymyz AQSh bul soǵystaǵy ustanymyn ózgertti, Ýkraınaǵa qoldaýyn azaıtty jáne odan ári ne bolatynyna kúmán keltirdi. Men AQSh bizdiń jaǵymyzda bolady dep sengim keledi, biraq biz bulaı bolmaıtynyna daıyn bolýymyz kerek, - dedi Frantsııa prezıdenti Emmanıýel Makron teledıdardan sóılegen sózinde.

Beısenbi kúni bas qosqan 27 kóshbasshy Ýkraınany ujymdyq qoldaýda birlik pen senimdilikti kórsetýge tyrysady jáne EO qandaı qaýipsizdik kepildikterin bere alady, qansha qosymsha aqsha bólýge daıyn jáne AQSh-tyń ornyna qajetin óteý úshin qanshalyqty alysqa bara alady degen sııaqty keıbir ózekti suraqtarǵa jaýap beredi.

Sonymen qatar, múmkin kelissózder úshin arnaıy ókil taǵaıyndaý týraly másele talqylanady.

Sondaı-aq, Ýkraına prezıdenti V.Zelenskııdiń ózi de qatysýy múmkin.

Alaıda, Eýropalyq Odaqtyń ózindegi sammıttiń kún tártibimen bári kelise bermeıdi. Vengrııa prezıdenti V.Orban D.Tramptyń beıbitshilikke jetý jolyndaǵy kúsh-jigerine nuqsan keltirýi múmkin kez kelgen jańa bastamany buzatynyn aıtyp qorqytty. Vengrııa basshysy «kúsh qoldaný arqyly beıbitshilikke jetý» tásiline qarsy, óıtkeni bul Ýkraınaǵa odan ári áskerı kómek kórsetýdi bildiredi.

- Prezıdent Donald Tramp tusynda Eýropanyń basym bóligi men AQSh arasynda strategııalyq - transatlantıkalyq alaýyzdyq bar, - dedi Orban sammıt aldynda.

Sonymen birge, Vengrııa lagerine qosylý arqyly Slovakııa da soǵysqa qarsy shyǵatynyn bildirdi.

Beısenbi kúngi sammıtte Ýrsýla fon der Lıaıenniń 800 mıllıard eýroǵa deıin qosymsha ınvestıtsııa jumyldyrý týraly sońǵy usynysy boıynsha qorǵanys shyǵyndary da qarastyrylady.

Osyǵan deıin Makron AQSh-tyń Eýropaǵa qatysty kez kelgen baj salyǵyna áreket etýge daıyn ekendigin aıtqan bolatyn.