Brıýsselde Eýropalyq odaq pen Ulybrıtanııanyń ekinshi sammıti ótip jatyr

ASTANA. KAZINFORM – Juma kúni Brıýsselde Eýropalyq odaq pen Ulybrıtanııanyń ekinshi sammıti bastaldy. Bul týraly Kazinform agenttiginiń EO janyndaǵy menshikti tilshisi habarlaıdy.

Vtoroı sammıt ES-Velıkobrıtanııa prohodıt v Brıýssele
Foto: Anadolu

Ulybrıtanııa premer-mınıstri Endı Bernem beısenbi kúni keshke Brıýsselge bardy. Búgin ol Eýropalyq keńes prezıdenti Antonıý Koshta jáne Eýropalyq komıssııa tóraǵasy Ýrsýla fon der Lıaıenmen kezdesedi.

Ekijaqty kelissózderden keıin mınıstrler men eýrokomıssarlardyń qatysýymen plenarlyq otyrys, sondaı-aq Eýroparlament tóraǵasy Roberta Metsolamen kezdesý josparlanǵan.

Bul – Ulybrıtanııa Eýropalyq odaqtan shyqqannan keıingi ekinshi joǵary deńgeıdegi kezdesý. Alǵashqy sammıt 2025 jylǵy mamyrda Londonda ótip, onda taraptar jańa strategııalyq áriptestik týraly kelisimge kelgen bolatyn. Bernemniń aldyndaǵy premer-mınıstr Kır Starmer otstavkaǵa ketkennen keıin keıinge qaldyrylǵan qazirgi kezdesý Brexit jónindegi referendýmnan beri on jyldan astam ýaqyt ótken soń ekijaqty baılanysty jaqyndastyrýdyń naqty qadamdaryn bekitýge baǵyttalǵan.

Kelissózderdiń kún tártibine agroazyq-túlik ónimderi salasyndaǵy erejelerdi retteý týraly kelisimder, sonyń ishinde azyq-túlik pen mal sharýashylyǵy ónimderine qatysty shekaralyq tekserýler men sertıfıkattar sanyn azaıtý, shyǵaryndylar kvotalarymen saýda jasaý júıelerin úılestirý jáne jastardyń mobıldiligin arttyrý múmkindikterin qarastyrý engizilgen.

Taraptar qaýipsizdik pen qorǵanys salasyndaǵy yntymaqtastyqty, zańsyz kóshi-qon men qylmysqa qarsy kúresti, sondaı-aq energetıka jáne klımat máselelerin de talqylaıdy.

2026 jylǵy shildede premer-mınıstr qyzmetine kirisken Endı Bernem buǵan deıin Brexit týraly jasalǵan kelisim Ulybrıtanııa ekonomıkasyna zııan keltirgenin jáne el budan da jaqsy nátıjege qol jetkize alatynyn málimdegen edi.

Onyń baǵalaýynsha, kelisimder paketi Ulybrıtanııa ekonomıkasynyń ósimine shamamen 0,4 paıyzdyq tarmaq qosýy múmkin. Buǵan fermerler men azyq-túlik ónerkásibi úshin bıýrokratııalyq kedergilerdi azaıtý jáne sýpermarketterdegi baǵa qysymyn tómendetý esebinen qol jetkizý kózdelip otyr. Ulybrıtanııa úkimeti agroazyq-túlik salasyndaǵy kelisimniń yqtımal ekonomıkalyq tıimdiligin jylyna 5,1 mlrd eýroǵa deıin baǵalaıdy.

Óz kezeginde Ýrsýla fon der Lıaıen sammıtten «bıik maqsattar men naqty nátıjeler» kútetinin aıtty. Onyń ishinde jastar úshin keń múmkindikter jasaý, agroazyq-túlik taýarlary saýdasyn jeńildetý jáne ekonomıkalyq qaýipsizdikti nyǵaıtý bar.

Sammıt qorytyndysy boıynsha birlesken deklaratsııa jarııalanady dep kútiledi.

Buǵan deıin Dýblınde Eýropalyq saıası qoǵamdastyq sammıti ótken bolatyn.