Brıýsselde Eýropalyq Odaq pen Parsy shyǵanaǵy yntymaqtastyq keńesi basshylarynyń birinshi sammıti ótedi
ASTANA. KAZINFORM – Sammıt búgin Parsy shyǵanaǵyndaǵy arab memleketteri yntymaqtastyǵy keńesiniń kezekti prezıdenti retinde birin biri aýystyratyn Eýropalyq keńes tóraǵasy Sharl Mıshel men Katar Ámiri sheıh Tamım ben Hamad Ál Tanıdiń teń tóraǵalyǵymen ótedi, dep habarlaıdy Kazinform-nyń menshikti tilshisi Arnur Rahymbekov.
Eýropalyq Odaqta atap ótkendeı, aldaǵy sammıt – EO úshin Parsy shyǵanaǵyndaǵy arab memleketteri yntymaqtastyǵy keńesi (PShAMYK) jáne oǵan múshe memleketter, sondaı-aq EO-nyń geostrategııalyq seriktesteri (Birikken Arab Ámirlikteri, Bahreın Koroldigi, Saýd Arabııasy Koroldigi, Oman Sultandyǵy, Katar Memleketi jáne Kýveıt Memleketi) tyǵyz seriktestik ornatý múmkindigi.
Talqylaýdyń negizgi taqyryptary – ortaq negizgi jahandyq syn-qaterler ekonomıkalyq yntymaqtastyq, onyń ishinde saýda men ınvestıtsııa, turaqty energetıkany damytý jáne klımattyq baılanystar jáne adamdar arasyndaǵy baılanys boıynsha odan ári yntymaqtastyqtyń joldary.
Eýroodaq pen Parsy shyǵanaǵyndaǵy arab memleketteri yntymaqtastyǵy keńesiniń qarym-qatynastary 1989 jyly qol qoıylǵan yntymaqtastyq kelisimine negizdelgen, ol EO men PShAMYK arasyndaǵy ekonomıkalyq qarym-qatynastar, klımattyń ózgerýi, energetıka, qorshaǵan orta jáne ǵylymı zertteýler salalaryndaǵy yntymaqtastyq boıynsha turaqty dıalogty belgileıdi.
Yntymaqtastyq kelisimi arqyly sonymen qatar turaqty túrde jınalatyn syrtqy ister mınıstrleri deńgeıinde EO-PShAMYK birlesken keńesi quryldy.
2022 jyldyń aqpanynda Brıýsselde ótken Birlesken keńes barysynda EO jáne Parsy shyǵanaǵy elderiniń syrtqy ister mınıstrleri 2022-2027 jyldarǵa arnalǵan Birlesken yntymaqtastyq baǵdarlamasyn maquldady, bul baǵdarlama 2023 jyldyń qazanynda jańartyldy.
Baǵdarlama naqty birlesken is-sharalar jáne kóptegen sektorlardaǵy yntymaqtastyqty tereńdetý belgilengen: saýda jáne ınvestıtsııa, klımattyń ózgerýi, jasyl kóshý, adamdar arasyndaǵy bastamalar, terrorızmge qarsy kúres.
2022 jyldyń maýsymynda Lýıdjı Dı Maıo Eýropalyq Odaqtyń Parsy shyǵanaǵy elderindegi tuńǵysh arnaıy ókili bolyp taǵaıyndaldy. Ol EO-nyń Parsy shyǵanaǵy aımaǵyndaǵy eldermen neǵurlym kúshti, jan-jaqty jáne strategııalyq seriktestigin odan ári damytýǵa jaýapty.
