Brıýsselde Eýropalyq Odaq-Batys Balqan sammıti ótti

ASTANA. KAZINFORM – Eýropa astanasynda EO-ǵa múshe elder men aımaqtyń alty memleketi basshycynyń qatysýymen «Eýroodaq – Batys Balqan» sammıti ótti, dep habarlaıdy Kazinform menshikti tilshisi.

Kezdesý EO men Batys Balqan elderi arasyndaǵy strategııalyq seriktestikke jańa serpin berýge, sonyń ishinde osy seriktestikti tereńdetý jáne Eýropalyq Odaqtaǵy ortaq bolashaqqa birge ilgerileý joldaryn talqylaýǵa múmkindik beredi, dep habarlady Eýropalyq Odaq ókilderi.

Talqylaýdyń negizgi taqyryptary: ekonomıkalyq ósý jospary arqyly EO jáne Batys Balqan elderiniń ıntegratsııasyn nyǵaıtý, syrtqy jáne qaýipsizdik saıasatyn qosa alǵanda, kóptegen salalarda Batys Balqan elderimen saıası baılanystardy tereńdetý, kóshi-qondy basqarý jáne sybaılas jemqorlyqpen jáne uıymdasqan qylmyspen kúres salasyndaǵy yntymaqtastyq.

Basshylar sondaı-aq eki aımaqtyń geosaıası konteksti men qıyndyqtaryn talqylady. Sammıtke Eýropalyq keńestiń jańa prezıdenti Antonıý Koshta tóraǵalyq etti. Sammıt qorytyndysy boıynsha deklaratsııa qabyldanady dep kútilip otyr.

Osyǵan deıin Brıýsselde Eýropalyq Odaq pen Parsy shyǵanaǵy yntymaqtastyq keńesi basshylarynyń birinshi sammıti ótetini týraly habarlandy.