Brıýsselde Eýroodaq kóshbasshylarynyń sammıti bastaldy
ASTANA. KAZINFORM – Eýropalyq odaqqa múshe 27 eldiń basshylary kezekti EO sammıtine qatysý úshin Belgııa astanasy Brıýsselge jınaldy. Sammıt barysynda eki mańyzdy máseleni sheshý josparlanyp otyr, dep habarlaıdy Kazinform agenttiginiń menshikti tilshisi.
Eýropa kóshbasshylary 2026–2027 jyldarǵa arnalǵan Ýkraınaǵa qarjylaı kómek kórsetý týraly sheshim qabyldaıdy dep kútilýde.
Alaıda qomaqty qarjy tartý tetigi áli de naqty aıqyndalmaǵan.
Balamaly nusqa retinde Ýkraınaǵa iri kólemde qaryz berý usynylyp otyr, biraq bul da EO-ǵa múshe elderdiń kópshiliginiń kelisimin talap etedi.
Osy oraıda Eýrokomıssııa tóraǵasy Ýrsýla fon der Lıaıen atalǵan sammıttiń sheshýshi sátte ótip jatqanyn atap ótti.
— Bizdiń basty maqsatymyz bireý Ýkraına úshin kúsh arqyly beıbitshilikke qol jetkizý. Ol úshin 2026–2027 jyldardaǵy Ýkraına qarjylyq qajettilikterin tolyq qamtamasyz etý asa mańyzdy. Qarastyrylyp jatqan eki usynys bar. Biz búgin naqty sheshim tabýǵa kelistik, — dedi Ý. fon der Lıaıen.
EO ishindegi saıası kelispeýshilikter Eýroodaqtyń MERKOSÝR elderimen jasalǵan saýda kelisimine baılanysty da ýshyǵyp otyr. Frantsııa men Italııa Latyn Amerıkasy elderinen arzan aýyl sharýashylyǵy ónimderiniń ımporttalýyna qarsy shyqty.
Narazylyq belgisi retinde Brıýsselge Belgııa men Frantsııadan shamamen 7 myń fermer keldi. Tańerteń traktorlardyń uzyn legi Eýropalyq kvartaldyń ortalyǵyna qaraı bet aldy. Kóptegen delegatsııaǵa baılanysty qaýipsizdik sharalary men fermerlerdiń ereýili saldarynan Brıýssel turǵyndary qala ortalyǵynda kólik qozǵalysynyń turalaýyna tap boldy.
Buǵan deıin Eýropa kóshbasshylary Kıev pen Máskeý arasyndaǵy yqtımal beıbit kelisimdi qamtamasyz etý úshin «kópultty kúshter» qurýdy usynǵan bolatyn.